سنڌ جي مختلف علائقن ۾ وقفي وقفي سان برسات جاري، جنهن سبب  هيٺانهين وارن علائقن ۾ پاڻي بيهجي ويو

سنڌ جي مختلف علائقن ۾ وقفي وقفي سان برسات جاري آهي، جنهن سبب  هيٺانهين وارن علائقن ۾ پاڻي بيهجي ويو آهي. سکر ۽ ڀرپاسي وارن علائقن ۾ برسات بعد موسم خوشگوار ٿي وئي، جڏهن ته بجلي جو نظام ڊانوان ڊول ٿي ويو. جيڪب آباد ۽ ڀرپاسي ۾ هلڪي برسات پوڻ بعد  گرمي جو زور گهٽجي ويو. غوثپور ۽ ڀرپاسي ۾ وسڪاري بعد شهر ۾ پاڻي بيهجي ويو. مبارڪپور ۽ ٻين علائقن ۾ مينهن پوڻ بعد موسم وڻندڙ ٿي وئي. تنگواڻي ۾ ۽ ڀرپاسي ۾ وسڪاري بعد مواصلاتي نظام ڊانوان ڊول ٿي ويو. سيٺارجا ۾ برسات پوڻ بعد هيٺانهين واران علائقا پاڻي هيٺ اچي ويا. لکي غلام شاهه ۽ ڀرپاسي ۾ وقفي وقفي سان برسات جو سلسلو جاري آهي. ناري تعلقي جي مختلف علائقن چونڊڪو، تجل، کينواري، سڪندر آباد، سائدو، فارهياڙو، ڪوٽ جبو ۽ اڇڙي ٿر ۾ برسات پئي آهي. سنڌڙي ۾ برسات پوڻ سبب گرمي جو زور گهٽجي ويو آهي، جڏهن ته وونئڻن جي فصل کي نقصان پهتو آهي.