سنڌ حڪومت پاران بيڪار گاڏيون نيلام ۽ ملازمن لاءِ اي وي گاڏيون خريد ڪرڻ جو فيصلو

سنڌ حڪومت بيڪار گاڏيون هڪ مهيني اندر نيلام ڪرڻ ۽ ڪراچي جي سرڪاري ملازمن لاءِ اي وي گاڏيون خريد ڪرڻ جو فيصلو ڪيو آهي. ڪراچيءَ ۾ سنڌ جي سينيئر وزير شرجيل انعام ميمڻ جي صدارت هيٺ سنڌ ڪابينا جي ڪفايت شعاري بابت ذيلي ڪميٽي جو اهم اجلاس ٿيو. اجلاس ۾ صوبائي وزير سعيد غني، ضياءَ الحسن لنجار، علي حسن زرداري ۽ مختلف کاتن جي سيڪريٽرين شرڪت ڪئي. ڪميٽي ميمبرن طرفان سرڪاري گاڏين جي الاٽمينٽ کي ريگوليٽ ڪرڻ لاءِ واضح گائيڊ لائن تي عمل جون هدايتون ڪيون ويون. مختلف کاتن جي سيڪريٽرين سرڪاري گاڏين جو ڏهن سالن جو رڪارڊ پيش ڪيو. سنڌ جي سينيئر وزير شرجيل انعام ميمڻ جو چوڻ آهي ته نيلامي جو عمل هڪ مهيني اندر مڪمل ٿيڻ گهرجي ته جيئن وسيلا وڌيڪ ضايع نه ٿين ۽ نين گاڏين جي ضرورت کي پورو ڪري سگهجي. هن چيو ته اي وي گاڏيون خريد ڪرڻ سان حڪومت کي فائدو ٿيندو، پي او ايل بچت ٿيندي، نيلامي ۾ به آساني ٿيندي، حڪومت عوامي وسيلن جي استعمال ۾ شفافيت ۽ احتساب کي يقيني بڻائڻ لاءِ پرعزم آهي. سنڌ جي سينيئر وزير چيو ته سرڪاري گاڏين جي غير مجاز استعمال ڪندڙن کي سختي سان چون ٿا ته حڪومتي حڪمن تحت گاڏيون واپس ڪن. شرجيل انعام ميمڻ چيو ته بيڪار گاڏين جي نيلامي تي به ڪم جاري آهي، نيلامي پوري شفافيت سان ڪئي ويندي، سمورا لاڳاپيل عهديدار ۽ کاتا قانوني ڪارروائي کان بچڻ لاءِ نئين هدايتن تي عمل ڪن. صوبائي وزير سعيد غني چيو ته بيڪار گاڏين جي بروقت نيلامي اهم آهي، غير ضروري خرچن ۾ گهٽتائي آڻي سگهجي ٿي، جن کاتن وٽ اضافي گاڏيون آهن اهي پنهنجي ضرورت کان وڌيڪ گاڏيون حڪومت کي واپس ڪري ڇڏن. صوبائي گهرو وزير ضياءَ الحسن لنجار جو چوڻ آهي ته بيگار گاڏين جي نشاندهي ۽ حڪومتي پاليسين جي تعميل کي يقيني بڻائڻ لاءِ تيزي سان ڪم ڪيو پيو وڃي، سندن مقصد عوام جا پيسا بچائڻ ۽ ضرورتن موجب خرچن کي يقيني بڻائڻ آهي. صوبائي وزير علي حسن زرداري چيو ته مڪمل طور تي شفاف نيلامي يقيني بڻائي وڃي، فنڊن سان نين گاڏين جي خريداري ۾ مدد ملندي.