- Advertisement -
مسلم ليگ ن جي پارلياماني پارٽيءَ وزيراعظم لاءِ شهبازشريف ۽ قومي اسيمبلي جي اسپيڪر لاءِ اياز صادق جي نالي جي منظوري ڏئي ڇڏي، اڳوڻي وزيراعظم ۽ ن ليگ جي قائد نوازشريف جو چوڻ آهي ته انشاءَ الله هيءَ حڪومت معيشت ٺيڪ ڪندي، خواهش آهي ته هر اسيمبلي، سينيٽ ۽ وزيراعظم پنهنجو مدو پورو ڪري.
ن ليگ جي پارلياماني پارٽيءَ جو اجلاس نوازشريف ۽ شهبازشريف جي صدارت هيٺ ٿيو، جنهن ۾ پارلياماني پارٽي نوازشريف ۽ شهبازشريف جي قيادت تي اعتماد جو اظهار ڪيو.
اجلاس دوران وزيراعظم لاءِ شهبازشريف جو نالو پيش ڪيو ويو، جنهن جي منظوري ڏني وئي.
ن ليگ جي پارلياماني پارٽيءَ قومي اسيمبلي جي اسپيڪر لاءِ اياز صادق جي نالي جي منظوري پڻ ڏني.
اجلاس کي خطاب ڪندي ن ليگ جي قائد نوازشريف چيو ته شهبازشريف وزيراعظم ۽ اياز صادق قومي اسيمبلي جي اسپيڪر لاءِ اميدوار هوندو.
هن چيو ته پاڪستان زخمي آهي، ملڪ کي ڏکيائين ۽ مصيبتن مان ڪڍڻو آهي.
سندس چوڻ هو ته ايندڙ ڏيڍ سال ڏکيو هوندو، کين متحد رهڻو آهي، هو ملڪ کي ڏکيائين مان ڪڍندا.
نوازشريف چيو ته کيس ڪڍندڙن ملڪ سان وڏو ظلم ڪيو، اڄ اهي ڪنهن کي منهن ڏيکارڻ جهڙا ناهن رهيا، کيس هٽائڻ ۾ ججن کانسواءِ ٻيا رانديگر به شامل هئا.
ن ليگ جي قائد چيو ته سياست ڀلي ڪئي وڃي پر ملڪي نظام کي خطري ۾ نه وڌو وڃي، پي ٽي آءِ جي ڌرڻن سبب ملڪ کي نقصان پهتو
ان موقعي تي شهباز شريف چيو ته آزاد اميدوارن غير مشروط طور ن ليگ ۾ شموليت ڪئي آهي، جنهن بعد سندن انگ 104 ٿي ويو آهي.
ان کان اڳ پارليامينٽ آمد تي صحافين سان ڳالهائيندي نوازشريف چيو ته سياسي عدم استحڪام جي ڪا به ڳالهه ناهي.
هن چيو ته خواهش آهي ته هر اسيمبلي، سينيٽ ۽ وزيراعظم پنهنجو مدو پورو ڪري.
نوازشريف چيو ته حڪومت معيشت ٺيڪ ڪندي ته سڀ ٺيڪ هوندو، انشاءَ الله سياسي ۽ معاشي استحڪام ايندو.
ن ليگ جي قائد چيو ته ڪو مسئلو ناهي، حڪومت ايندي ئي معيشت ٺيڪ ڪندي.
نوازشريف چيو ته سمورا معاملا معيشت تي ڳنڍيل آهن، اها ٺيڪ تي ته سڀ ڪجهه ٺيڪ ٿيندو….- Advertisement -
