پي ٽي آءِ باني جو سوشل ميڊيا اڪائونٽ اڊيالا جيل مان پيو هلائي: شرجيل ميمڻ

سينيئر صوبائي وزير شرجيل ميمڻ چيو آهي ته پي ٽي آءِ باني جو سوشل ميڊيا اڪائونٽ اڊيالا جيل مان آپريٽ پيو ٿئي، هي شخص اقتدار جي حوس ۾ ملڪ کي داءَ تي لڳائڻ لاءِ تيار آهي، ان بابت وزيراعظم خدشا درست آهن، عدالت مان ڪنهن کي به غير ضروري رليف نه ملڻ گهرجي، پي ٽي آءِ دور ۾ ڪجهه مخصوص ماڻهن کي اربين رپيا معاف ڪيا ويا. ڪراچيءَ ۾ ميڊيا سان ڳالهائيندي شرجيل ميمڻ چيو ته ڪراچي ۾ ٽرانسپورٽ جي بهتريءَ لاءِ ڪم ڪيو پيو وڃي، موٽر رجسٽريشن آفيس سوِڪ سينٽر پاڪستان جي سڀ کان وڏي آفيس آهي، عوام کي آسانيون فراهم ڪرڻلاءِ هر ممڪن قدم کنيا پيا وڃن. هن چيو ته پي ٽي آءِ باني مونجهاري جو شڪار آهي، کيس ملڪ خلاف لانچ ڪيو ويو، پاڪستان جي وڏين شخصيتن پي ٽي آءِ باني جي لانچنگ کان اڳ چئي ڇڏيو هو، ان بابت وزيراعظم جا خدشا غلط ناهن. شرجيل ميمڻ چيو ته 2018ع ۾ پهريان پي ٽي آءِ بانيءَ قرض معاف ڪرايا، مخصوص ماڻهن جا  40-40 ارب رپيا پي ٽي آءِ بانيءَ پاڻ معاف ڪيا. سينيئر صوبائي وزير چيو ته پي ٽي آءِ بانيءَ پنهنجي اڪائونٽ تان وڊيو اپلوڊ ڪئي، بئريسٽر گوهر چيو ته وڊيو جو مقصد اداري کي ٽارگيٽ ڪرڻ نه هو. شرجيل ميمڻ چيو ته هي اهو ئي شخص هو، جيڪو  چوندو هو ته سڄي دنيا مان روزگار لاءِ ماڻهن هتي ايندا، پيپلزپارٽيءَ تاريخ جي بدترين تشدد کي منن ڏنو سمورين سزائن باوجود ملڪي سالميت خلاف سازش نه ڪئي، شهادتون به ڏنيون ۽ پاڪستان کپي جو نعرو به هنيو. سينيئر صوبائي وزير چيوته ايڪسائز جا آفيسر ايڪشن وٺي رهيا آهن، هتي ڪا به سفارش ناهي، جيڪو ڪم ڪندو اهو رهندو، کين پنهنجي فورسز جو ساٿ ڏيڻ گهرجي، جتي غلطيون ۽ ڪوتاهيون هونديون آهن، اتي سزا ملي ٿي……………………