آءِ جي پنجاب ڊاڪٽر عثمان انور جڙانوالا سانحي جي متاثر مسيحي خاندانن لاءِ دانش اسڪول ۾ قائم ڪيل حفاظتي ڪيمپ جو دورو ڪيو ۽ متاثرن ۾ ضروري شيون ۽ تحفا ورهايا.
ڊاڪٽر عثمان انور, آر پي او فيصل آباد عابد خان، ڊي آءِ جي احسن يونس، سي پي او عثمان اڪرم گوندل، ايس ايس پي محمد افضل، ضلعي انتظاميا ۽ پوليس جي اعليٰ پوليس آفيسرن گڏ متاثر مسيحي علائقن جو دورو ڪيو.
آءِ جي پنجاب دوري دوران جڙانوالا امن امان جي مجموعي صورتحال، سڪيورٽي انتظامن، متاثر چرچن ۽ عيسائي آبادي جي رهائشگاهن جو جائزو ورتو.
ان سان گڏ ڊاڪٽر عثمان انور مسيحي برادري جي نمائندن ۽ شهرين سان پڻ ملاقات ڪئي ۽ کين پنجاب پوليس طرفان مڪمل سيڪيورٽي فراهم ڪرڻ جو يقين ڏياريو.
ڊاڪٽر عثمان انور ڳالهائيندي چيو ته پنجاب حڪومت متاثر گرجا گهرن ۽ رهائشين جي بحاليءَ جو ڪم فوري طور تي شروع ڪري رهي آهي، پنجاب پوليس عيسائي برادري جي ٻارن کي پوليس ويلفيئر اسڪولن ۾ مفت تعليم ۽ سهولتون فراهم ڪندي.
