سڌ سماءَ واري وفاقي وزير عطا تارڙ چيو آهي ته آءِ پي پيز تي سياست ٿي رهي آهي، پروٽيڪٽڊ واهپيدارن کي ٽن مهينن لاءِ بلن ۾ رليف ڏنو.
اسلام آباد ۾ ايم ڪيو ايم اڳواڻ مصطفيٰ ڪمال سان گڏ پريس ڪانفرنس ڪندي سڌ سماءَ واري وفاقي وزير عطا تارڙ چيو ته پنجاب حڪومت بجلي جا 2 سستا ترين پاور پلانٽ لڳايا هئا، وزيراعظم بجلي ورهائيندڙ ڪمپنين کي خانگائڻ جو اعلان ڪيو هو.
هن چيو ته ڊسڪوز کي خانگائڻ جو عمل شروع ٿي چڪو آهي، فيصلو ڪيو ويو هو ته ڊسڪوز کي سياسي مداخلت کان پاڪ ڪيو ويندو، پروٽيڪٽڊ واهپيدارن کي ٽن مهينن لاءِ رليف ڏنو ويو آهي، 50 ارب رپيا سبسڊي ڏني وئي، بجلي چوري روڪڻ لاءِ صوبائي حڪومتن سان گڏجي ڪم ڪيو پيو وڃي.
عطا تارڙ چيو ته بجلي جي بلن جي ادائيگي ۾ 10 ڏينهن واڌ ڪئي وئي آهي، آءِ پي پيز جي معاملي تي صلاح مشورا ڪيا پيا وڃن، سموري قوم چاهي ٿي ته بجلي سستي ٿئي، ڪجهه ماڻهو آءِ پي پيز جي معاملي کي سياست لاءِ استعمال ڪرڻ چاهن ٿا.
سڌ سماءَ واري وفاقي وزير چيو ته پاسڪو آفيسرن خلاف ڪارروائي ڪئي وئي آهي، فائلر ۽ نان فائلرن جا انگ اکر به جلد جاري ڪيا ويندا، معاشي سڌارن جي ايجنڊا ترجيح آهي، فائلرز ۾ 50 لک ماڻهن جو اضافو ٿيو آهي.
هن چي ته ايف بي آر کي ڊجيٽائز ڪيو پيو وڃي، پي ڊبليو ڊي سال جا الائي ڪيترا ارب کائي وڃي ٿو، ان مافيا ۾ اڄ تائين ڪنهن به هٿ ناهي وڌو.
ان موقعي تي مصطفيٰ ڪمال چيو ته وزيراعظم ۽ سندس ٽيم جنهن سطح تي ڪم ڪري رهيا آهن، اميد آهي ته ماڻهن کي رليف ملندو، ايم ڪيو ايم طرفان هو وزيراعظم جو ٿورائتو آهي.
هن چيو ته هو حڪومت کي سٺن قدمن سان گڏ آهن، ان معاملي تي سياست ناهي ڪئي، آءِ پي پيز سان معاهدا ختم ڪيا ته اهي پرڏيهه ۾ ڪنهن ڪورٽ ۾ وڃي سگهن ٿا
