اليڪشن ڪميشن، مخصوص سيٽن بابت سپريم ڪورٽ جي فيصلي خلاف نظرثاني اپيل داخل ڪرائي ڇڏي آهي.
اليڪشن ڪميشن طرفان سپريم ڪورٽ ۾ داخل ڪرايل درخواست ۾ سني اتحاد ڪائونسل، صاحبزادا حامد رضا، ايم ڪيو ايم، پ پ، ن ليگ ۽ ٻين کي ڌر بڻايو ويو آهي.
درخواست ۾ موقف اختيار ڪيو ويو ته تحريڪ انصاف کي عدالتي فيصلي ۾ رليف ڏنو ويو، تحريڪ انصاف ڪيس ۾ پارٽي نه هئي ۽ آزاد ميمبرن به سپريم ڪورٽ سان رابطو نه ڪيو، عدالتي فيصلي ۾ ڪجهه اهڙين حقيقتن کي تسليم ڪيو ويو، جيڪي عدالتي رڪارڊ تي نه هيون.
اليڪشن ڪميشن موجب پي ٽي آءِ مخصوص سيٽن جي اميدوارن به ڪڏهن دعويٰ نه ڪئي، 80 ميمبرن سني اتحاد ڪائونسل ۾ شامل ٿيڻ جو فيصلو ڪيو ۽ ڊڪلريشن جمع ڪرائي.
درخواست ۾ چيو ويو ته سني اتحاد ڪائونسل عام چونڊن ۾ حصو نه ورتو ۽ مخصوص سيٽن لاءِ لسٽ به جمع نه ڪرائي، تنهنڪري 41 ايم اين ايز کي ٻيهر پارٽي وابستگي جو موقعو فراهم ڪرڻ جو ڪو به جواز ناهي، جڏهن ته اليڪشن ڪميشن کي ان معاملي تي موقف ڏيڻ جو موقعو نه ڏنو ويو ۽ ٻڌڻ کانسواءِ فيصلو ٻڌايو.
درخواست ڏيندڙ چيو ته سپريم ڪورٽ جي 12 جولاءِ واري فيصلي جا حڪم هڪ پارٽيءَ جي حق ۾ آهن، فيصلي ۾ آئين ۽ قانون جي آرٽيڪلن توڙي شقن کي نظر انداز ڪيو ويو آهي، 12 جولاءِ جي اڪثريتي مختصر فيصلي ۾ عدالتي اختيار وارو دائرو اورانگهيو ويو آهي.
