اليڪشن ڪميشن طرفان جاري ڪيل پڌرائي موجب، قومي ۽ صوبائي اسيمبلين ۾ تحريڪ انصاف سان لاڳاپيل سمورا ميمبر هاڻي آزاد

خيبرپختونخوا ۾ نئين وڏي وزير جي چونڊ کان اڳ تحريڪ انصاف کي وڏو ڌچڪو، اليڪشن ڪميشن سپريم ڪورٽ جي فيصلي جي روشني ۾ سني اتحاد ڪائونسل ۽ تحريڪ انصاف جي اسيمبلي ميمبرن کي آزاد قرار ڏئي ڇڏيو. اليڪشن ڪميشن طرفان جاري ڪيل پڌرائي موجب، قومي ۽ صوبائي اسيمبلين ۾ تحريڪ انصاف سان لاڳاپيل سمورا ميمبر هاڻي آزاد آهن. اليڪشن ڪميشن چيو ته سپريم ڪورٽ جي 25 آگسٽ 2025ع جي تفصيلي فيصلي کانپوءِ ميمبرن جي وابستگي پي ٽي آءِ ۽ سني اتحاد ڪائونسل سان ظاهر نه ٿيندي. سپريم ڪورٽ جي آئيني بينچ جي فيصلي جي روشني ۾ قومي اسيمبليءَ سميت صوبائي اسيمبلين ۾ پارٽي پوزيشن به تبديل ٿي وئي. اليڪشن ڪميشن قومي اسيمبلي، پنجاب، سنڌ ۽ ڪي پي اسيمبلين جي پارٽي پوزيشن بابت نئين لسٽ جاري ڪري ڇڏي. قومي اسيمبلي ۾ مسلم ليگ ن جا 125  ميمبر ۽ پ پ جي ميمبرن جو انگ 74 ٿي ويو، ايم ڪيو ايم پاڪستان جا 22، مسلم ليگ ق جا پنج، آءِ پي پي جي ميمبرن جو انگ 4 ٿي ويو. مسلم ليگ ضيا، نيشنل پارٽي ۽ بلوچستان عوامي پارٽي جو قومي اسيمبلي ۾ هڪ هڪ ميمبر آهي. قومي اسيمبليءَ ۾ آزاد ميمبرن جو انگ 79 آهي، جميعت علماءِ اسلام پاڪستان جي ميمبرن جو انگ 10 ٿي ويو. سني اتحاد ڪائونسل، ايم ڊبليو ايم،  بي اين پي ۽ پي ڪي ميپ جو قومي اسيمبلي ۾ هڪ هڪ ميمبر آهي…….