بلوچستان ۾ آپريشن جو فيصلو اعليٰ قيادت ۽ بلوچستان جي اسٽيڪ هولڊرن سان گڏجي ڪيو ويندو : خواجه آصف

بچاءَ واري وزير خواجه آصف چيو آهي ته بلوچستان ۾ آپريشن جو فيصلو اعليٰ قيادت ۽ بلوچستان جي اسٽيڪ هولڊرن سان گڏجي ڪيو ويندو، دهشتگردي ڀارت ۽ افغانستان مان ٿي رهي آهي، جنهن جي پاڙ پٽي ويندي، جعفر ايڪسپريس تي حملي کانپوءِ تحريڪ انصاف سوشل ميڊيا تي ناڪاري واويلا ڪئي. قومي اسيمبلي اجلاس ۾ خطاب ڪندي خواجا آصف چيو ته بلوچستان ۾ جعفر ايڪسپريس تي حملو انتهائي افسوسناڪ آهي، پاڪ فوج دهشتگردي خلاف آپريشن ۾ هڪ تاريخ رقم ڪئي آهي. سندس چوڻ هو ته پاڪ فوج گهٽ کان گهٽ نقصان ۾ بهترين ڪارڪردگي ڏيکاري، سندن جوانن بهادري سان دهشتگردن جو مقابلو ڪيو. بچاءَ واري وزير خواجا آصف چيو ته جعفر ايڪسپريس تي حملي کانپوءِ تحريڪ انصاف سوشل ميڊيا تي ناڪاري ڪردار ادا ڪيو، دهشتگردن هٿين خالي مسافرن کي نشانو بڻايو. هن چيو ته تحريڪ انصاف سوشل ميڊيا بريگيڊ دهشتگردن کي ڪريڊٽ ڏنو، سوشل ميڊيا تي چيو ويو ته دهشتگردن مسافرن کي پاڻ ڇڏيو، سازشون ڪندڙ تحريڪ انصاف جا ماڻهو پرڏيهه ۾ آهن. بچاءَ واري وزير چيو ته حڪومت کي فارم 47 جي پيداوار جو طعنو ڏيندڙ پاڻ مارشل لا جي پيداوار آهن، ٻين تي آڱريون کڻندڙن کي پنهنجو ماضي ڏيڻ گهرجي، دهشتگردن کي پاڪستان ۾ آڻي آباد ڪرڻ جون ڳالهيون ڪنهن ڪيون، ڪير نٿو ڄاڻي؟. خواجا آصف چيو ته سرفراز بگٽي دهشتگردن خلاف ڄمي بيٺو آهي، ڪي پي ۾ دهشتگردي خلاف ڄمي ڇو نٿو بيان ڏنو وڃي، جعفر ايڪسپريس حملي تي ايوان ۾ متفقه آوار نه اٿاريو ويو، ڪو شرم هوندو آهي، ڪو حياءُ هوندو آهي.