توانائي واري صوبائي وزير ناصر شاهه آگسٽ مهيني دوران سولر پئنل جي فراهمي يقيني بڻائڻ جي هدايت ڪئي آهي.
پ پ چيئرمين بلاول ڀٽو زرداري جي هدايت تي توانائي واري صوبائي وزير ناصر شاهه جي صدارت هيٺ توانائي کاتي جو اين جي اوز سان اجلاس ٿيو.
اجلاس ۾ توانائي کاتي سيڪريٽري مصدق احمد خان، ڊائريڪٽر سنڌ سولر انرجي پراجيڪٽ محفوظ قاضي سميت مختلف اين جي اوز جي سربراهن شرڪت ڪئي.
اجلاس ۾ ورلڊ بئنڪ جي سهڪار سان سولر پئنل جي فراهمي بابت تفصيلي ڳالهيون ڪيون ويون.
اجلاس کي خطاب ڪندي صوبائي وزير ناصر شاهه چيو ته هلندڙ مهيني دوران ئي سولر پئنل جي فراهمي شروع ڪئي ويندي.
هن چيو ته پ پ چيئرمين بلاول ڀٽو زرداري جي هدايت تي منصوبي جي شفافيت يقيني بڻائي وڃي.
سندس چوڻ هو ته جلد هر ڊويزن ۽ هر ڊسٽرڪٽ ۾ سولر پئنل ورهائڻ جو ڪم شروع ڪيو ويندو.
صوبائي وزير ناصر شاهه چيو ته عوام کي مفت بجلي فراهم ڪرڻ بابت مختلف منصوبن تي ڪم ڪيو پيو وڃي.
هن چيو ته سنڌ سرڪار سستي بجلي فراهم ڪري عوام کي رليف ڏيڻ جي خواهشمند آهي.
سندس چوڻ هو ته سولرائيزيشن جو عمل عوام کي سستي بجلي فراهم ڪرڻ جو ذريعو آهي.
صوبائي وزير ناصر شاهه چيو ته مهانگي بجلي عوام جي پهچ کان ٻاهر ٿي چڪي آهي، صوبي جا ماڻهو مهانگي بجلي سبب عذاب جو شڪار آهن.
