جڙانوالا ۾ قرآن پاڪ جي مبينا بي حرمتي خلاف مڇريل ماڻهن مسيحي آبادي تي ڪاهه ڪري مندرن ۽ گرجا گهرن کي باهه ڏئي ڇڏي، پنجاب جي نگران حڪومت واقعي اعليٰ سطح جاچ جو حڪم ڏنو آهي.
فيصل آباد جي علائقي ڪرسچن ڪالوني ۽ عيسيٰ نگري ۾ مڇريل ماڻهن چئن گرجا گهرن ۽ مسيحي برادري جا ڪيترائي گهر توڙي ملڪيتون ۽ گاڏيون ساڙي ڇڏيون.
ڊپٽي ڪمشنر علي عنان قمر جو چوڻ هو ته جڙانوالا ۾ ڇڪتاڻ واري صورتحال سبب سموري ضلعي ۾ قلم 144 لاڳو ڪيو ويو آهي، شهر ۾ حالتون معمول ۾ اچڻ تائين اهو قلم لاڳو رهندو.
نگران وزيراعظم انوارلحق ڪاڪڙ، اڳوڻي وزيراعظم شهبازشريف، پ پ چيئرمين بلاول ڀٽو زرداري، اڳوڻي صدر آصف علي زرداري، مريم نواز ۽ ٻين طرفان واقعي جي سخت لفظن ۾ مذمت ڪئي آهي.
نگران وزيراعظم انوارالحق جڙانوالا ۾ اقليتن جي ملڪيتن تي حملن جو نوٽِس وٺندي ملوث جوابدارن کي فوري طور گرفتار ڪرڻ جو حڪم ڏنو آهي.
پنجاب جي نگران حڪومت جڙانوالا واقعي جي اعليٰ سطح ي جاچ ڪرائڻ جو حڪم ڏنو آهي.
پنجاب حڪومت جي ترجمان موجب سوچيل سمجهيل سازش تحت جڙانوالا ۾ اقليتن کي نشانو بڻايو ويو، معاملي جي اعليٰ سطحي جاچ ڪرائي ملوث ماڻهن کي عبرتناڪ سزا ڏني ويندي.
