حماس 3 مرحلن ۾ جنگ بندي جي تجويز پيش ڪري ڇڏي، اسرائيلي وزيراعظم حماس جي تجويزن کي رد ڪندي رفح ۾زميني آپريشن جي منظوري ڏئي ڇڏي.
عرب ميڊيا موجب، حماس 700 کان هڪ هزار فلسطيني قيدين جي آزادي جو مطالبو ڪيو آهي، تجويزن ۾ اسرائيلي جيلن ۾ عمر قيد جي هڪ سئو فلسطينين قيدين جي آزادي به شامل آهي.
عرب ميڊيا موجب، قيدين جي بدلي يرغمالين جي آزادي کانپوءِ مستقل جنگ بندي جي تاريخ طئي ڪئي ويندي، پهرين مرحلي کانپوءِ غزه جي پٽي کان اسرائيلي فوجين کي واپس گھرائڻ جي ڊيڊلائين تي به اتفاق ڪيو ويندو.
عرب ميڊيا موجب، حماس منصوبي جي ٻئي مرحلين ۾ ٻنهي طرفن کان سڀني قيدين کي آزاد ڪيو ويندو.
ٻئي پاسي اسرائيلي وزيراعظم نيتن ياهو حماس جي تجويزن کي رد ڪري رفح ۾ زميني آپريشن جي منظوري ڏئي ڇڏي آهي، جڏهن ته فوج کي وڏي آپريشن لاءِ تيار رهڻ لاءِ حڪم جاري ڪيا ويا.
نيتن ياهو جو چوڻ آهي ته حماس خلاف مڪمل فتح ئي غزه جنگ جو واحد حل آهي.
هوڏانهن امريڪا، حماس جي تجويزن کي عمل جوڳو قرار ڏنو آهي.
امريڪي قومي سلامتي بابت ترجمان جان ڪربي جو چوڻ آهي ته حماس پنهنجي حد ۾ رهي ڪري تجويزون پيش ڪيون آهن، هو پراميد آهن ته شيون صحيح رخ ۾ اڳتي وڌي رهيون آهن.
هوڏانهن اسرائيلي جنگي ڪابينا جي اجلاس ۾ حماس جي تجويزن جو جائزو ورتو ويو.
ٻئي پاسي پرڏيهي ميڊيا دعوى ڪئي آهي ته اسرائيلي وفد امڪاني معاهدي تي ڳالهين لاءِ آچر ڏينهن قطر روانو ٿيندو.
