حيدرآباد پوليس مقابلي دوران هڪ ڏوهاريءَ زخمي حالت ۾ گرفتار

حيدرآباد پوليس مقابلي دوران هڪ ڏوهاريءَ کي زخمي حالت ۾گرفتار ڪري سندس قبضي مان هٿيار هٿ ڪرڻ جي دعوى ڪئي آهي. پوليس جو چوڻ آهي ته ڦليلي ٿاڻي جي حد گورنمنٽ خورشيد بيگم ڪاليج ويجهو ڏوهارين سان مقابلو ٿي پيو، فائرنگ جي ڏي وٺ دوران جوابدار عمران عرف نينو پنهور کي زخمي حالت ۾ گرفتار ڪيو ويو جڏهن ته سندس ساٿي فرار ٿي ويا. پوليس موجب، گرفتار جوابدار ساٿين سان گڏ موٽر سائيڪل چوري ڪري رهيو هو، پوليس جي پهچڻ تي جوابدارن فائرنگ ڪئي، جوابي فائرنگ ۾ هڪ ڄڻي کي زخمي حالت ۾ گرفتار ڪيو ويو. پوليس ترجمان جو وڌيڪ چوڻ آهي ته گرفتار جوابدار جي قبضي مان هٿيار هٿ ڪري کيس طبي امداد لاءِ اسپتال منتقل ڪيو ويو آهي جڏهن ته وڌيڪ جاچ ڪئي پئي وڃي.