حڪومت ڪرغزستان معاملي تي انڪوائري ڪميٽي جوڙڻ جو اعلان ڪري ڇڏيو

حڪومت ڪرغزستان معاملي تي انڪوائري ڪميٽي جوڙڻ جو اعلان ڪري ڇڏيو، پرڏيهي وزير اسحاق ڊار چيو آهي ته بشڪيڪ ۾ وڳوڙن بعد شاگرد خوف جو شڪار آهن، وڳوڙن بابت فيڪٽ فائڊنگ ڪميٽي جوڙي ويندي، جنهن جو نوٽيفڪيشن اڄ ئي جاري ڪيو ويندو. اسلام آباد ۾ پريس ڪانفرنس ڪندي اسحاق ڊار چيو ته آستانه ۾ شنگهائي سهڪار تنظيم جي پرڏيهي وزير ڪائونسل اجلاس ۾ شرڪت ڪئي ۽ ڪرغزستان ۾ پاڪستاني سفير حسن علي ضيغم کي پيغام اماڻيو ته هو اجلاس بعد ڪرغز پرڏيهي وزير سان ملاقات جو انتظام ڪريو. سندس چوڻ هو ته اجلاس بعد ڪرغزستان جي پرڏيهي وزير سان ملاقات ڪئي، جنهن دوران پاڪستاني شاگردن تي حملن بابت ڳالهيون ڪيون ۽ درخواست ڪئي ته هو بشڪيڪ وڃي شاگردن کي ڏسڻ چاهي ٿو. پرڏيهي وزير اسحاق ڊار چيو ته ڪرغز پرڏيهي وزير پنهنجي صدر سان ڳالهايو، جنهن تي هن کيس ڀليڪار ڪيو ۽ پوءِ هو ڪرغز هم منصب سان گڏ آستانه کان بشڪيڪ روانو ٿيو. هن چيو ته ڪرغزستان جي نائب وزيراعظم سان گڏ اسپتال جو دورو ڪيو ۽ ڪرغز انتظاميا وڳوڙن بابت تفصيلي بريفنگ ڏني وئي. پرڏيهي وزير چيو ته ٽن مان ٻن شاگردن کي اسپتال مان ڊسچارج ڪيو ويو آهي، هڪ شاگرد شاهزيب اڃا تائين علاج هيٺ آهي، اٽڪ جي زخمي شاگرد شاهزيب کي فوري طور پاڪستان آندو ويندو. اسحاق ڊار چيو ته ڪرغزستان جي صدر بشڪيڪ ۾ وڳوڙن جو سخت نوٽيس ورتو، وڳوڙن جي ذميوارن جو پتو لڳائي گرفتار ڪيو ويو، بشڪيڪ ۾ حالتون مڪمل طور معمول تي اچي ويون آهن. پرڏيهي وزير اسحاق ڊار چيو ته بشڪيڪ ۾ وڳوڙن بعد شاگرد خوف جو شڪار آهن، وڳوڙن بابت فيڪٽ فائڊنگ ڪميٽي جوڙي ويندي، جنهن جو نوٽيفڪيشن اڄ ئي جاري ڪيو ويندو، بشڪيڪ ۾ 11 سئو جي لڳ ڀڳ پاڪستاني پورهيت ڪم ڪري رهيا آهن.