حڪومت ڪنهن به اصول تي ڪمپرومائيز نه ڪندي : اسحاق ڊار

نائب وزيراعظم ۽ پرڏيهي وزير اسحاق ڊار چيو آهي ته حڪومت ڪنهن به اصول تي ڪمپرومائيز نه ڪندي. لنڊن ۾ ميڊيا سان ڳالهائيندي اسحاق ڊار چيو ته جيڪڏهن ڪنهن کي سزا ٿي رهي آهي ته ان ۾ هو ڇا ٿا ڪري سگھن، جن ماڻهن 9 مئي جا واقعا ڪيا اهي قيمت ادا ڪري رهيا آهن. هن چيو ته 9 مئي واقعن ۾ شاهدين جي بنياد تي سزائن جو عمل جاري آهي، جيڪڏهن ڪنهن کي سياست ڪرڻي آهي ته پاڪستان اچي ڪري، حڪومت ڪنهن به اصول تي ڪمپرومائيز نه ڪندي، لکين ڊالر ڏئي ملڪي ادارن کي بدنام ڪرائڻ قابل مذمت آهي. نائب وزيراعظم چيو ته پاڪستاني معيشت ترقي طرف وڌي رهي آهي، مهانگائي سنگل ڊجٽ ۾ اچي چڪي آهي. هن اهو به چيو ته ايران ۾ پيش آيل واقعو افسوسناڪ آهي، هو ايراني اختيارين سان رابطي ۾ آهي، پاڪستاني سفارتخانو به پنهنجي ماڻهن سان مڪمل سهڪار ڪري رهيو آهي، جن ماڻهن اهو واقعو ڪيو ايراني حڪومت انهن کي سخت سزا ڏيندي. نائب وزيراعظم موجب، سمنڊ پار پاڪستانين کي مڪمل عزت ڏني ويندي، پاڪستان ۾ وڏو ڪنوينشن ٿيڻ وڃي رهيو آهي، سڀاڻي ۾ ان ۾ شرڪت ڪري خاص اعلان ڪيا ويندا. اسحاق ڊار جو وڌيڪ چوڻ هو ته حڪومت بهار جو ڏينهن ملهائڻ تي نظر ثاني ڪري رهي آهي، حفاظتي قدمن سان اهو ڏينهن ملهائڻ گھرجي.