رستم ۾ قتل ٿيل پرائمري استاد جي قتل ۾ اڳوڻي ايس ايڇ او قربان ککراڻي جي ملوث ھجڻ جو انڪشاف

رستم ۾ 23 سيپٽمبر تي قتل ٿيل پرائمري استاد جي قتل ۾ اڳوڻي ايس ايڇ او قربان ککراڻي جي ملوث ھجڻ جو انڪشاف ٿيو آهي. مقتول استاد صدام مھر جي والد گلزار علي مھر جي شڪايت تي آءِ جي سنڌ اڳوڻي ايس ايڇ او قربان ککراڻي خلاف جاچ ڪميٽي جوڙي ھئي. جاچ ڪميٽي جي آفيسرن عبدالقدوس ڪلوڙ ۽ ايس ايس پي سميع الله سومرو جاچ ۾ انڪشاف ڪيو آھي ته اڳوڻو ايس ايڇ او قربان ککراڻي جوابدار انجنيئر سعدخاناڻي، قلندرو سعدخاناڻي ۽ باشو سعدخاناڻي سان آگسٽ کان مسلسل رابطي ۾ هو ۽ ھُن 28 لک رپيا رشوت وٺي 23 سيپٽمبر تي پرائمري استاد کي رستم شھر ۾ قتل ڪرايو. جاچ ڪميٽي ۾ اھو به انڪشاف ٿيو آھي ته واقعي واري ڏينھن قربان ککراڻي شڪارپور ھجڻ جو بھانو ڪري جوابدارن کي پرائمري استاد بابت ايس ايم ايس ذريعي ڄاڻ فراھم ڪندو رھيو ۽ واقعي بعد کيس اطلاع به مليو پر هو شڪارپور ھجڻ جو جواز ڄاڻائي قتل واري هنڌ به نه آيو ھو. رپورٽ ۾ اھو به انڪشاف ڪيو ويو آھي ته مقتول استاد صدام مھر جي قاتل بشام سعدخاناڻي گرفتاري بعد ٿاڻي تي اعتراف ڪيو ته ايس ايچ او قربان ککراڻي صدام مھر کي قتل ڪرائڻ جا کائن 28 لک رپيا ورتا آھن ۽ بعد ۾ ھن الزام هنيو ته کانئس اھڙو بيان زبردستي ڏياريو ويو آھي. هوڏانهن جاچ ڪميٽي جي رپورٽ بعد مقتول جي وارثن مطالبو ڪيو آهي ته رستم ٿاڻي جي اڳوڻي ايس ايڇ او قربان ککراڻي کي گرفتار ڪيو وڃي.