سال 2026ع ملڪ ۾ مفاهمت، استحڪام ۽ قومي اعتماد جي نئين باب جي شروعات ثابت ٿيندو : بلاول ڀٽو زرداري

پ پ چيئرمين بلاول ڀٽو زرداري قوم کي نئين سال جي مبارڪ ڏيندي چيو آهي ته سال 2026ع ملڪ ۾ مفاهمت، استحڪام ۽ قومي اعتماد جي نئين باب جي شروعات ثابت ٿيندو. نئين سال جي شروعات تي پنهنجي پيغام ۾ بلاول ڀٽو زرداري ملڪ ۽ قوم لاءِ هڪ پراميد نئين سال 2026ع جي دعا ڪئي. سندس چوڻ هو ته سال 2026ع ملڪ ۾ مفاهمت، استحڪام ۽ قومي اعتماد جي نئين باب جي شروعات ثابت ٿيندو. پ پ چيئرمين چيو ته 2025ع آزمائشن سان ڀريل هو، پر ان سندن قومي اتحاد ۽ حوصلي کي هڪ ڀيرو ٻيهر ثابت ڪيو، مئي ۾ پاڪ فوج پاڪ ڀارت جنگ دوران دشمن کي عبرتناڪ شڪست ڏني. بلاول ڀٽو زرداري چيو ته پاڪ فوج جي هن ڪاميابي قومي خودمختاري جو تحفظ ڪيو، عوام ۽ سندن سرحدن جي نگهبانن وچ ۾ اعتماد جي رشتن کي وڌيڪ مضبوط بڻايو، نئون سال ڳالهين، مفاهمت ۽ زخمن جي ازالي لاءِ وقف هئڻ گهرجي. هن چيو ته سياسي استحڪام ئي معاشي بحالي، ترقي ۽ عوامي ڀلائي جو بنياد آهي، قومون ان وقت اڳتي وڌنديون آهن جڏهن اختلافن کي جمهوري ادارن ذريعي حل ڪيو وڃي. پ پ چيئرمين چيو ته ملڪ ۾ جمهوريت، آئين جي بالادستي ۽ سماجي انصاف بابت پيپلزپارٽي عزم سان گڏ بيٺل آهي، پ پ اڄ به قائد عوام شهيد ذوالفقار ڀٽو ۽ شهيد راڻي محترمه بينظير جي ويزن تي ڪاربند آهي. بلاول ڀٽو زرداري چيو ته قائد عوام شهيد ڀٽو ۽ محترمه بينظير ڀٽو جو ويزن عوامي اختيار، انساني وقار ۽ برابري تي ٻڌل آهي، يقين آهي ته هن سال اتحاد ۽ اجتماعي عزم ذريعي پاڪستان هڪ پرامن، خوشحال ۽ ترقي يافته مستقبل طرف تيزي سان وڌندو.