سنڌ جي مختلف شهرن ۾ روڊ حادثن جي نتيجي ۾ ماءُ ۽ پٽ سميت 3 ڄڻا فوت ۽ پيءُ پٽ سميت 6 ڄڻا زخمي ٿي پيا آهن.
ڄامشوري ۾ روڊ حادثي جي نتيجي ۾ ماءُ ۽ پٽ فوت ۽ پيءُ پٽ زخمي ٿي پيا.
انڊس هاءِ وي تي ڪار ۽ موٽرسائيڪل ۾ ٽڪر ٿي پيو.
حادثي جي نتيجي ۾ 28 ورهين جي فوزيه ۽ سندس ڏهن ورهين جو پٽ احسان چانڊيو فوت ٿي ويا جڏهن ته پورهيت سڌير چانڊيو ۽ سندس پنجن ورهين جو پٽ ثناءُ الله زخمي ٿي پيا.
حادثي بعد فوتين جا لاش ۽ زخمين کي لمس اسپتال منتقل ڪيو ويو.
زخمين جي حالت ڳڻتي جوڳي هئڻ سبب کين سول اسپتال حيدرآباد ريفر ڪيو ويو.
ماءُ ۽ پٽ جا لاش پوسٽ لاءِ ڪوٽڙي جي اسپتال منتقل ڪيا ويا جتان ضروري ڪارروائي بعد مڙهه وارثن حوالي ڪيا ويا.
پوليس ڊرائيور کي گرفتار ڪري ڪار کي تحويل ۾ وٺي ڇڏيو.
ڄام صاحب ويجهو روڊ حادثي جي نتيجي ۾ هڪ ڄڻو اجل جو شڪار ٿي ويو جڏهن ته 4 ڄڻا زخمي ٿي پيا.
نوابشاهه روڊ تي ڳوٺ محمد بخش زرداري ويجهو ڪڪڙين سان ڀريل گاڏي سان حادثو پيش آيو.
حادثي جي نتيجي ۾ فيصل ٿڏي تي ئي فوت ٿي ويو جڏهن ته حيدر علي، جواد ملڪ، راڻا اخلاق ۽ ارشاد راجپوت سخت زخمي ٿي پيا.
حادثي بعد فوتي جو لاش ۽ زخمين کي اسپتال منتقل ڪيو ويو جتان ضروري ڪارروائي بعد مڙهه وارثن حوالي ڪيو ويو.
