سنڌ جي مختلف شهرن ۾ صحافي جان محمد مهر جي قاتلن جي گرفتاري، نينگري فاطمه ڦرڙو جي خون سان انصاف، پريا ڪماري سميت اغوا ٿيل ٻارڙن جي بازيابيءَ لاءِ جي ڊبليو سي، سياسي سماجي تنظيمن ۽ قلم ڌڻين پاران احتجاجي ريليون ڪڍي مظاهرا ڪري ڌرڻا هنيا ويا.
ڪنري ۾ پريا ڪماري سميت گم ٿيل ٻارن جي بازيابي، نينگري فاطما ڦرڙو جي خون سان انصاف ۽ صحافي جان محمد مهر جي قاتلن جي گرفتاري لاءِ جسقم تعلقي اڳواڻ رمضان خاصخيلي ۽ ٻين جي اڳواڻيءَ ۾ احتجاجي مظاھرو ڪري ڌرڻو هنيو ويو.
ڪوٽڏيجي ۾ قلم ڌڻين ۽ شهرين پاران جان محمد مهر جي قاتلن جي گرفتاري لاءِ احتجاجي ريلي ڪڍي ڪوٽ بنگلو ۾ ڪري ڌرڻو هڻي نعريبازي ڪئي وئي.
وارهه ۾ صحافي جان محمد مهر ۽ فاطما ڦرڙو جي خون سان انصاف لاءِ عرفان منان کاهوڙي، غلام مصطفيٰ ۽ ٻين پريس ڪلب اڳيان احتجاجي مظاهرو ڪري ڌرڻو هنيو.
ٽنڊي آدم ۾ جي ڊبليو سي جي سڏ تي صحافي جان محمد مهر جي قاتلن جي گرفتاري لاءِ احتجاجي مظاهرو ڪيو ويو.
ڪنڊيارو ۾ جسقم پاران شهيد صحافي جان محمد مهر، اصغر کنڊ جي قاتلن جي گرفتاري ۽ پريا ڪماري جي بازيابي لاءِ ڪارڪنن پاران اسٽار چوڪ تي ڌرڻو هنيو ويو.
وڳڻ ۾ ٻارڙي پريا ڪماري جي بازيابي ۽ صحافي جان محمد مهر جي قاتلن جي گرفتاري لاءِ جسقم ڪارڪنن پاران جي ايم وڳڻ، رکيل ٻرڙو، شبير ديشي جي اڳواڻي ۾پراڻي بس اسٽاپ کان مک چوڪ تائين احتجاجي ريلي ڪڍي وئي.
مٺياڻي ويجهو ٺٽ ڳوراهو ۾ جسقم پاران ٻارڙي پريا ڪماري جي بازيابي، شهيد جان محمد جي قاتلن جي گرفتاري ۽ راڻيپور ۾ قتل ٿيل نينگري فاطمه ڦرڙو جي خون سان انصاف لاءِ صوفي خالد چنا، سرائي ظفر کوکر ، زاهد پنهور ۽ ٻين جي اڳواڻي ۾ احتجاجي مظاهرو ڪيو ويو.
مرزا پور ۾ سينيئر صحافي جان محمد مهر جي قاتلن جي گرفتاري لاءِ هاري جدوجهد ڪميٽي ۽ ريلوي ورڪرز يونين پاران احتجاجي مظاهرو ڪيو ويو.
ڪنب ۾ صحافي جان محمد مهر جي قاتلن جي گرفتاري لاءِ صحافين ۽ شهرين پاران احمد رند، اوشاق ڄامڙو جي اڳواڻي ۾ احتجاجي مظاهرو ڪيو ويو.
دولتپور صفن ۾ صحافي جان محمد مهر ۽ راڻيپور ۾ پيرن جي حويلي ۾ تشدد ۾ قتل ٿي ويل نينگري فاطمه ڦرڙو جي قاتلن جي گرفتاري لاءِ وڪيلن، صحافين ۽ سماجي اڳواڻن محبوب جوکيو، ايڊوڪيٽ آفتاب علي جي اڳواڻي ۾ احتجاجي مظاهرو ڪري ڌرڻو هنيو ويو.
ڄام صاحب ۾ جسقم جي مرڪزي سڏ تي پريا ڪماري جي بازيابي ڪارڪنن پاران معشوق ڏاهري ، عزيز الله ڏاهري ۽ ٻين جي اڳواڻي ۾ احتجاجي مظاهرو ڪيو ويو.
اڳواڻن چيو ته صحافي جان محمد مهر ۽ فاطما ڦرڙو واقعي جي جيتري مذمت ڪجي اها گهٽ آهي.
هنن چيو ته جان محمد مهر جو قتل قلم ڌڻين ۽ انسانيت جو قتل، حق سچ جي آواز کي دٻائڻ جي ڪوشش آهي، پيراڻي حويلي ۾ نينگري فاطمه ڦرڙو جو تڙپي تڙپي فوت ٿي انتهائي ڳڻتي جوڳي ڳالهھ آھي.
سندن چوڻ هو ته پريا ڪماري سميت اغوا ٿيل ٻارڙن جي بازياب ڪرائي ملوث سمورن جوابدارن ۽ مددگارن کي قانون جي ڪٽهڙي ۾ آندو وڃي.
اڳواڻن مطالبو ڪيو ته صحافي جان محمد مهر جي قاتلن کي گرفتار، نينگري فاطمه ڦرڙو جي خون سان انصاف ۽ پريا ڪماري سميت اغوا ٿيل ٻارڙن کي بازياب ڪرائي بيچيني ختم ڪئي وڃي.
