سنڌ حڪومت موسمياتي تبديليءَ کي منهن ڏيڻ ۽ في ايڪڙ پيداوار وڌائڻ لاءِ هارين جي تربيت شروع ڪري ڇڏي

سنڌ حڪومت موسمياتي تبديليءَ کي منهن ڏيڻ ۽ في ايڪڙ پيداوار وڌائڻ لاءِ هارين جي تربيت شروع ڪري ڇڏي. زراعت واري صوبائي وزير محمد بخش مهر جو چوڻ آهي ته موسمياتي تبديلي زرعي شعبي لاءِ وڏو خطرو بڻجي وئي آهي، فصل متاثر ٿي رهيا آهن ۽ هارين کي نقصان ٿي رهيو آهي. سندس چوڻ هو ته هارين جي تربيت بابت کنيل قدمن سان نه صرف هارين جي آمدني وڌندي پر خوراڪ جي تحفظ کي به يقيني بڻايو ويندو. محمد بخش مهر جو چوڻ هو ته ڪلائميٽ اسمارٽ ايگريڪلچر منصوبو “سنڌ واٽر اينڊايگريڪلچر ٽرانسفارميشن” جي تحت شروع ڪيو ويو آهي. زراعت واري صوبائي وزير جو چوڻ هو ته هارين کي فصل جي پيداوار، ٻوٽي جي واڌ، جيتن جي خاتمي ۽ گهٽ پاڻيءَ تي فصل پوکڻ جا طريقا سيکاريا پيا وڃن. محمد بخش مهر جو چوڻ هو ته هي منصوبو 5 سالن تي ٻڌل آهي ۽ 2028 تائين جاري رهندو. سندس چوڻ هو ته منصوبي ۾ 180 فيلڊ اسڪول قائم ڪيا ويندا ۽ ساڍا چار هزار هارين کي تربيت ڏني ويندي. محمد بخش مهر جو چوڻ هو تههن سال پهرين مرحلي ۾ 750 هارين کي جديد زرعي طريقن جي تربيت ڏني پئي وڃي. سندس چوڻ هو ته سکر، ميرپورخاص ۽ بدين ۾ 30 ڊيمو پلاٽس ۽ فيلڊ اسڪول قائم ڪيا ويا آهن, جتي تربيت ڏني پئي وڃي.