سنڌ هاءِ ڪورٽ صوبي ۾ نئين ڀرتين خلاف اسٽي آرڊر ۾ 3 آڪٽوبر تائين واڌ ڪري ڇڏي.
سنڌ هاءِ ڪورٽ ڪراچي ۾ نوڪرين تي پابندي بابت ايم ڪيو ايم جي درخواست تي ٻڌڻي ڪئي.
ٻڌڻي دوران سنڌ حڪومت جي ماتحت هلندڙ ادارن جا آفيسر عدالت ۾ پيش ٿيا.
جسٽس ظفر احمد راجپوت رمارڪس ڏنا ته اهو نه ٿو ٿي سگهي ته ديڳ پچائي ۽ پنهنجن ۾ ورهائي ڇڏيو، واڪ ان انٽرويو جي بنياد تي نوڪريون نه هجڻ گهرجن.
هن چيو ته ميرٽ لسٽ مان گهٽ مارڪن وارا ڪڍي نوڪريون ڏيڻ وارو ڪيس هو ٻڌي چڪا آهن.
درخواست ڏيندڙ جي وڪيل چيو ته جيَ ايس ٽي، پي ايس ٽي وارن جي نوڪرين جو 2021ع ۾ اعلان ٿيو هو، کين ويٽنگ لسٽ ۾ رکيو ويو آهي، کين چيو ويو ته جڏهن ڪو رٽائر ٿيندو يا مرندو ته نوڪريون ملنديون.
جسٽس ظفر چيو ته اها ڪهڙي ڳالهه آهي اميدوار هاڻي ماڻهن جي مرڻ جو انتظار ڪندا؟ جيڪڏهن ويهه جايون خالي آهن ته ملازمت جو به اشتهار ويهن جو ڏنو وڃي.
ايم ڪيو ايم جي وڪيل فروغ نسيم چيو ته عدالت حڪم باوجود پوين تاريخن ۾ اپائٽمينٽ ليٽر جاري ڪيا ويا، سنڌ حڪومت جي ماتحت هلندڙ ادارن عدالتي حڪم تي عمل ناهي ڪيو، انهن کان جواب طلب ڪيو وڇي.
جسٽس ظفر چيو ته ان مسئلي جو حل اهو آهي ته پگهارون تڏهن ملنديون جڏهن بائيو ميٽرڪ تصديق ٿيندي، هو ڊسٽرڪٽ اڪائونٽ آفيسر کان رپورٽ طلب ڪن ٿا، ليٽر پويِن تاريخن ۾ جاري ٿي سگهي ٿو پر بائيو ميٽرڪ کان سواءِ پگهار جاري نٿي ٿي سگهي.
عدالت ايندڙ ٻڌڻي تي سنڌ حڪومت، ڊسٽرڪٽ اڪائونٽ آفيسر ۽ ٻين کان جواب طلب ڪري ورتو.
عدالت جو چوڻ هو ته سمورا ادارا 15 ڏينهن اندر پنهنجون رپورٽون جمع ڪرائين.
عدالت ڪيس جي ٻڌڻي 3 آڪٽوبر تائين ملتوي ڪري ڇڏي
