سيد زين شاھ پاران 14 نومبر تي حيدرآباد ۾ جلسي جو اعلان

تحريڪ تحفظ آئين پاڪستان جي مرڪزي نائب صدر سيد زين شاھ 14 نومبر تي حيدرآباد ۾ جلسي جو اعلان ڪندي چيو آهي ته 27 ھين آئيني ترميم ۾ جيڪڏهن صوبن جي خودمختياري يا مالياتي حصي ۾ ڪٽوتي بابت قانونسازي ٿي ته سخت احتجاج ڪيو ويندو. ڪراچي پريس ڪلب ۾ حليم عادل شيخ ۽ ٻين اتحادي پارٽين جي اڳواڻن سان گڏ پريس ڪانفرنس ڪندي زين شاهه چيو ته 2024 جي اليڪشن کانپوءِ تحريڪ تحفظ آئين پاڪستان وجود ۾ آئي ۽ 2022 ۾ جيڪو نظام آيو، ان خلاف هو سڀ گڏ ٿيا. هن چيو ته ھي ملڪ صرف آئين تحت ئي ھلي سگھي ٿو، آئيني نظام لاءِ عوام سان گڏجي جدوجهد ڪندا. سندس چوڻ هو ته عوامي رابطا مھم جي سلسلي ۾ حيدرآباد ۾ 14 نومبر تي جلسو ٿيندو، جنهن ۾ مرڪزي قيادت شرڪت ڪندي. زين شاهه چيو ته 27 ترميم ته اچڻي آھي، ڪجهه اطلاع مليا آھن ته ان ۾ آئين جو بنياد لوڏيو پيو وڃي، بنياد انساني حقن کان وٺي صوبائي مالي حقن تائين توڙي سول سپرميسي ۽ پارلياماني جھموري نظام خلاف ڪجهه آندو پيو وڃي، ائين ٿيو ته 1973 وارو آئين پنهنجي اھميت وڃائي ڇڏيندو. سندس چوڻ هو ته جبري طور جيڪڏهن خودمختياري يا مالي صوبائي اختيارين کي ختم ڪيو ويو ته هو ان کي تسليم نه ڪندا. ان موقعي تي پي ٽي آءِ سنڌ جي صدر حليم عادل چيو ته هن وقت اهي فيصلا ڪن پيا جن کي عوامي مينڊيٽ حاصل ئي ناھي، ڏنڊي جي زور تي ڪجهه ڪيو ويو ته عوام قبول نه ڪندو….