سپريم ڪورٽ نيب ترميمون ڪيس پريڪٽس اينڊ پروسيجر ايڪٽ جي فيصلي سان مشروط ڪندي ٽرائل ڪورٽن کي نيب ريفرنسن جي قطعي فيصلن کان روڪي ڇڏيو آهي.
چيف جسٽس قاضي فائز عيسيٰ جي سربراهيءَ ۾ 5 رڪني لارجر بئنچ نيب ترميمن جي فيصلي خلاف انٽرا ڪورٽ اپيل تي ٻڌڻي ڪئي، جنهن دوران اٽارني جنرل منصور عثمان ۽ فاروق نائڪ عدالت ۾ پيش ٿيا.
ٻڌڻي دوران چيف جسٽس چيو ته نيب ترميمون ڪيس جو اقليتي فيصلو به اچي چڪو آهي، اپيل ۾ وفاقي حڪومت هڪ نڪتو پريڪٽس اينڊ پروسيجر قانون جو اٿاريو آهي، ڇا اوهان ان نقطي جي پيروي ڪرڻ چاهيو ٿا؟
هن چيو ته جيڪڏهن اوهان جو دليل تسليم ڪيو وڃي ته نيب ترميمن خلاف درخواستون التوا هيٺ هونديون ۽ انهن تي 5 رڪني بئنچ فيصلو ڪندي.
ٻڌڻي دوران اٽارني جنرل اپيلن تي پريڪٽس اينڊ پروسيجر قانون لاڳو ٿيڻ جي حمايت ڪئي.
چيف جسٽس چيو ته اڃا تائين پريڪٽس اينڊ پروسيجر ڪيس جو تفصيلي فيصلو ناهي آيو، ڇا مناسب نه هوندو ته تفصيلي فيصلي جو انتظار ڪيو وڃي؟
جسٽس قاضي فائز عيسيٰ چيو ته اهو چوڻ درست ناهي ته نيب ترميمن ذريعي ڪنهن فائدو حاصل ڪيو، نيب ترميمن سان ڪجهه خراب نه ٿيو، رڳو ڪيسن جو فورم تبديل ٿيو آهي.
فاروق ايڇ نائڪ نيب ترميمن جو فيصلو معطل ڪرڻ جي درخواست ڪئي، جنهن تي چيف جسٽس چيو ته نيب ترميمون ڪيس جو فيصلو معطل نه ڪيو ويندو، رڳو احتساب عدالتن کي قطعي فيصلو ڪرڻ کان روڪيو ويندو.
هن چيو ته نيب ترميمون ڪيس جي فيصلي خلاف اپيلن کي پريڪٽس اينڊ پروسيجر ڪيس جو تفصيلي فيصلو اچڻ بعد مقرر ڪيو ويندو.
چيف جسٽس چيو ته پريڪٽس اينڊ پروسيجر قانون جي قطعي نقطي تي دليل ڏيندا ته عدالت کي سيڪشن 4 لاڳو ڪرڻو پوندو.
سپريم ڪورٽ نيب ترميمون ڪيس کي پريڪٽس اينڊ پروسيجر ايڪٽ تي تفصيلي فيصلي سان مشروط ڪندي ٻڌڻي اڻ ڄاڻايل مدي تائين ملتوي ڪري ڇڏي.
چيف جسٽس چيو ته سپريم ڪورٽ نيب ترميمون ڪيس ۾ پي ٽي آءِ چيئرمين کي نوٽيس جاري ڪري ٿي، نيب، اٽارني جنرل، صوبائي ايڊووڪيٽ جنرل ۽ ايڊووڪيٽ جنرل اسلام آباد کي نوٽيس جاري ڪيا وڃن ٿا.
