سپريم ڪورٽ فوجي عدالتن ۾ عام شهرين جي ٽرائل خلاف درخواستن جي ٻڌڻي اڻڄاڻايل مدي تائين ملتوي ڪري ڇڏي، چيف جسٽس عمر عطا بنديال رمارڪس ڏيندي چيو آهي ته سپريم ڪورٽ آئين ۽ عوام جو دفاع ڪندي، فوج کي ڪنهن به غير آئيني قدم کان روڪيو ويندو، 9 مئي تي سنگين واقعا ٿيا، ڀت ڀڃي فوجي ٿاڪن تي حملو ڪيو ويو، شهرين مٿان گوليون نه هلائڻ تي فوج جي تعريف ڪرڻ گهرجي، ملڪ ۽ عدالت تي ڏکيو وقت آهي.
سپريم ڪورٽ ۾ فوجي عدالتن ۾ عام شهرين جي ٽرائل خلاف درخواستن جي ٻڌڻي ٿي.
چيف جسٽس عمر عطا بنديال جي سربراهيءَ ۾ ڇهه رڪني بينچ ٻڌڻي ڪئي.
ٻڌڻي دوران بئريسٽر اعتزاز احسن چيو ته پارليامينٽ ۾ نئون قانون منظور ٿيو آهي، ڳجها ادارا ڪنهن به وقت ڪنهن جي به جهڙتي وٺي سگهن ٿا، انٽيليجنس ايجنسين کي بنا وارنٽ جي جهڙتي جو حق قانون سازي ذريعي ڏنو ويو، هن قانون سان ته لامحدود اختيار ڏنا ويا آهن.
اعتزاز احسن چيو ته هتي سپريم ڪورٽ جا 6 جج ويٺا آهن، هن وقت سپريم ڪورٽ جي 6 ججن جي حيثيت فل ڪورٽ جهڙي آهي، سپريم ڪورٽ آفيشل سيڪريٽ ايڪٽ خلاف پاڻمرادو نوٽيس وٺي.
چيف جسٽس اعتزاز احسن کان پڇاڻو ڪيو ته آفيشل سيڪريٽ ايڪٽ بل آهي يا قانون؟، بل پارليامينٽ جي ٻئي ايوان ۾ بحث هيٺ آهي، ڏسون پارليامينٽ جو ٻيو ايوان ڇا ٿو ڪري، ان بابت کين گهڻي خبر ناهي، رڳو اخبار ۾ پڙهيو آهي، لارجر بينچ جو فيصلو آهي ته اڪيلو چيف جسٽس پاڻمرادو نوٽيس نٿو وٺي سگهي.
چيف جسٽس عمر عطا بنديال چيو ته هو آئين ۽ عوام جو دفاع ڪندا، فوج کي ڪنهن به غير آئيني ڪارروائي کان روڪيندا، 9 مئي تي انتهائي سنگين واقعا پيش آيا.
هن چيو ته ميانوالي ۾ ڀت ڀڃي فوجي ٿاڪن تي حملا ڪيا ويا، فوج جي ساراهه ڪرڻ گهرجي ته هن شهرين تي فائرنگ نه ڪئي، هو ڪڏهن به نه چاهيندو ته پاڪ فوج شهرين تي گوليون هلائي.
چيف جسٽس عمر عطا بنديال چيو ته اعتزاز احسن جڏهن چيو ته مظاهرين کي گوليون ڇو نه هلايون ويون، کيس ڏاڍو ڏک ٿيو، پاڪ فوج، عوام ۽ ملڪ جي دفاع لاءِ آهي، پاڪ فوج گوليون نه هلائي سٺو قدم کنيو.
چيف جسٽس پنهنجي ريمارڪس ۾ وڌيڪ چيو ته هو آئين ۽ عوام جو دفاع ڪندا، فوج کي ڪنهن به غير آئيني عمل کان روڪيندا، هٿياربند فوج کي غير قانوني ڪم ڪرڻ جي اجازت نه ڏيندا.
چيف جسٽس جي ريمارڪس تي اٽارني جنرل موقف اختيار ڪيو ته عدالت کي ٽرائل بابت يقين فوج جي اعليٰ قيادت پاران ڏياريو ويو آهي، عدالت کي جيڪو يقين ڏياريو ويو آهي ان تي عمل ڪيو وڃي.
ٻڌڻي دوران وڪيل لطيف کوسا جي درخواست تي چيف جسٽس پنهنجي رمارڪس ۾ چيو ته هڪ ساٿي کي پنهنجي انٽر ذاتي سببن ڪري هڪ مهيني لاءِ موڪل تي وڃڻو آهي، ملڪ ۽ عدالت تي ڏکيو وقت آهي.
سپريم ڪورٽ فوجي عدالتن ۾ شهرين جي ٽرائل خلاف ڪيس جي ٻڌڻي اڻڄاتل مدي تائين ملتوي ڪري ڇڏي.
