شهيد ذوالفقار علي ڀٽو پاڪستان جي محروم، مظلوم طبقي جو آواز آهي: بلاول ڀٽو زرداري

پ پ چيئرمين بلاول ڀٽو زرداري، ملڪ جي پهرين چونڊيل وزيراعظم شهيد ذوالفقار علي ڀٽو کي سندس 98هين سالگرهه تي ڀيٽا پيش ڪئي، سندس چوڻ آهي ته شهيد ذوالفقار علي ڀٽو پاڪستان جي محروم، مظلوم ۽ پٺتي پيل طبقن جو لازوال آواز آهي. قائد عوام شهيد ذوالفقار علي ڀٽو جي جنم ڏينهن جي موقعي تي پنهنجي پيغام ۾ بلاول ڀٽو زرداري چيو ته شهيد ذوالفقار علي ڀٽو عوام کي وقار، سڃاڻپ ۽ اميد ڏني، قائد عوام اها انقلابي سوچ متعارف ڪرائي ته اصل طاقت جو سرچشمو عوام آهي. سندس چوڻ هو ته اٽي، لٽي ۽ اجهي جي فلسفي کان 1973ع جي متفقه آئين تائين شهيد ڀٽو غريب عوام جي خوابن کي رياستي ايجنڊا بڻايو. پ پ چيئرمين چيو ته پاڪستان جي شڪست نه جوڳي دفاع جو بنياد به شهيد ڀٽو ايٽمي پروگرام جي شروعات ڪري رکيو، ذوالفقار علي ڀٽو جي شهادت سندس نظرين کي خاموش نه ڪري سگهي. بلاول ڀٽو زرداري چيو ته قائد عوام جا نظريا اڄ به نسل کان نسل ظلم، ڏاڍ ۽ ناانصافي خلاف جدوجهد جو حوصلو عطا ڪري رهيا آهن. هن چيو ته قائد عوام شهيد ذوالفقار علي ڀٽو ۽ شهيد محترمه بينظير ڀٽو جي ويزن تي پيپلزپارٽي ڪاربند آهي، شهيد ڀٽو هر ان آواز ۾ زنده آهي جيڪو حقن جي ڳالهه ڪري ٿو.