صدر زرداري جو نيشنل ايرو اسپيس سائنس اينڊ ٽيڪنالوجي پارڪ جو دورو

صدر آصف علي زرداري راولپنڊي ۾  هوائي فوج جي نگراني هيٺ نيشنل ايرو اسپيس سائنس اينڊ ٽيڪنالاجي پارڪ جو دورو ڪيو آهي. ان موقعي تي هوائي فوج جو سربراهه ظهير احمد بابر سڌو به موجود هو. صدر آصف علي زرداري کي دوري دوران پارڪ بابت تفصيلي بريفنگ ڏني وئي. بريفنگ ۾ ٻڌايو ويو ته سائنس اينڊ ٽيڪنالاجي پارڪ هوائي فوج جي ترقي جي سفر ۾ اهم ڪاميابي آهي، هي منصوبو قومي اهميت جوڳو آهي. بريفنگ ڏني وئي ته سائنس اينڊ ٽيڪنالاجي پارڪ پاڪستان ۾ علم ۽ ٽيڪنالاجي تي ٻڌل معيشيت جو بنياد ٿيڻ لاءِ تيار آهي. بريفنگ ۾ ٻڌايو ويو ته پارڪ جو مقصد خلائي، سائبر، آءِ ٽي، مصنوعي ذهانت ۽ ايرو اسپيس ۾ خانگي ۽ پبلڪ سيڪٽر جي ادارن کي جوڙڻ آهي، پارڪ اڀرندڙ ٽيڪنالاجي، تحقيق، تياري ۽ جدت سان گڏ قومي منظر نامي کي تبديل ڪندو. بريفنگ ڏني وئي ته پارڪ سان ملڪ کي سماجي، اقتصادي، سڪيورٽي ۽ سائنسي طور تي فائدو ٿيندو. صدر آصف علي زرداري هوائي فوج ۽ سندس هنرمند اهلڪارن جي ساراهه ڪئي. صدر زرداري نيشنل ايرو اسپيس سائنس اينڊ ٽيڪنالاجي پارڪ ۾ جديد ترين ٽيڪنيڪل ماحولياتي نظام جي واکاڻ ڪئي آهي. صدر پاران جديد جنگي چئلينجن کي منهن ڏيڻ ۽ قومي اسٽريٽجڪ اهميت واري منصوبي کي مثالي مدي ۾ مڪمل ڪرڻ تي هوائي فوج جي قيادت جي ويزن ۽ ڪارڪردگي کي ساراهيو ويو.