ڪراچي جي ميئر مرتضيٰ وهاب چيو آھي عوام جي شڪايتن جي فوري حل لاءِ ڪي ايم سي ۽ ٽائون انتظاميه جوڳا اپاءَ وٺن.
مرتضيٰ وھاب ايم ڊي سنڌ سالڊ ويسٽ مينجمينٽ بورڊ امتياز علي شاهه سان گڏ شھر جي مختلف علائقن جو دورو ڪري پاڻي جي نيڪال جي ڪم جو معائنو ڪري شهرين کي رليف فراهم ڪرڻ جون ھدايتون ڪيون.
ميئر ڪراچي، شهيد ملت روڊ، شاهراهه فيصل، نرسري، ٽيپو سلطان روڊ، نيو ايم اي جناح روڊ، سولجر بازار، مزار قائد روڊ، نمائش، ايم اي جناح روڊ جو تفصيلي دورو ڪيو.
مرتضيٰ وھاب چيو ته دوري دوران صفائي سٿرائي جو عملو به علائقن ۾ موجود هو، پاڻي جي نيڪال ۽ ڪچرو کڻڻ جو ڪم جاري آهي.
ھن چيو ته موسميات کاتي جي وڌيڪ برساتن جي اڳڪٿي کي نظر ۾ رکندي سمورو عملو الرٽ آھي ۽ موڪلون به رد ڪيون ويون آھن.
مرتضيٰ وهاب چيو ته عوامي شڪايتن جي فوري ازالي لاءِ قدم کنيا وڃن.
سندس چوڻ ھو ته گذريل رات تيز برسات کانپوءِ پاڻي نيڪال ڪرڻ لاءِ آفيسر ۽ عملو رات دير تائين روڊن تي موجود رھيا.
ميئر ڪراچي مرتضيٰ وھاب چيو ته پاڻي نيڪال ٿيڻ کانپوءِ رات جو ڪيترائي روڊ صاف ڪيا ويا، امڪاني برساتن کي نظر ۾ رکندي ايمرجنسي لاڳو رهندي، شڪايت داخل ڪرڻ لاءِ هيلپ لائن تي رابطو ڪيو وڃي.
