غزه تي اسرائيلي دهشتگردي ۽ نسل ڪشي کي 216 ڏينهن ٿي ويا، يهودي فوج گذريل 24 ڪلاڪن دوران وڌيڪ 60 فسلطينين کي شهيد ڪري ڇڏيو.
عرب ميڊيا موجب، غزه جي پٽي ۽ رفح تي تازن حملن ۾ وڌيڪ 12 فلسطيني شهيد ٿي ويا جڏهن ته يهودي فوج دير البلاح، الزيتون، ۽ ٻين علائقن تي 12 کان وڌيڪ گهرن تي بمباري پڻ ڪئي.
عرب ميڊيا موجب، 7 آڪٽوبر کان هن وقت تائين 34 هزار 904 فلسطيني شهيد ۽ 78 هزار 514 زخمي ٿي چڪا آهن.
ٻئي پاسي اسرائيل رفح ۾ وڏي زميني حملي جي تياري شروع ڪري ڇڏي.
عرب ميڊيا جو چوڻ آهي ته اسرائيلي فوج غزه جي سرحد ڀرسان ٽينڪ بيهاري ڇڏيا اهن جڏهن ته ، اولهه واري علائقي تي گولا باري ڪئي پئي وڃي.
اسرائيلي حملن کانپوءِ رفح مان 80 هزار فلسطينين لڏپلاڻ شروع ڪري ڇڏي آهي يهودي فوج اولهه ڪناري ۾ مختلف هنڌن تي ڇاپا هڻي 25 فلسطينين کي گرفتار ڪري اڻڄاتل هنڌ منتقل ڪري ڇڏيو.
ٻئي پاسي حماس رفح ۾ اسرائيلي فوج تي حملو ڪيو جنهن جي نتيجي ۾ 3 يهودي فوجي زخمي ٿيا آهن.
ٻئي پاسي فلسطين جي رڪنيت بابت گڏيل قومن جي جنرل اسيمبلي جو خصوصي اجلاس اڄ ٿيندو.
گڏيل عرب امارتن طرفان گڏيل قومن جي جنرل اسيمبلي ۾ فلسطيني کي مڪمل آزاد ۽ خودمختيار رياست جو درجو ڏيڻ لاءِ قرار داد پيش ڪئي ويندي.
