قطر جي ٽياڪڙيءَ ۾ آمريڪا ۽ ايران هڪٻئي جا قيدي آزاد ڪري ڇڏيا، جڏهن ته آمريڪا ڏکڻ ڪوريا ۾ ايران جا منجمد ڪيل 6 ارب ڊالر به بحال ڪري ڇڏيا آهن.
پرڏيهي ميڊيا موجب ايران آمريڪا جي پنجن شهرين جي آزاديءَ عيوض 6 ارب ڊالر جو فائدو کنيو آهي، جڏهن ته آمريڪا به پنجن ايراني قيدين مهرداد، مهين انصاري، ڪمبيز عطار ڪاشاني، رضا سرهنگ پور ڪافراني، امين حسن زادا ۽ ڪاوي افراسيابي کي آزاد ڪري ڇڏيو آهي.
جيئن ئي ايران کان آمريڪي قيدين کي کڻي جهاز اڏام ڀري ته ايران جا ڏکڻ ڪوريا ۾ منجمد 6 ارب ڊالرن جي رقم به بحال ڪئي وئي.
اها رقم ڏکڻ ڪوريا کان دوحه جي اڪائونٽن ۾ منتقل ٿيندي، جتان معاهدي تحت قطر ان رقم جي انساني بنيادن تي خرچ کي يقيني بڻائيندو.
هوڏانهن آمريڪا جن پنجن ايراني قيدين کي آزاد ڪيو آهي، انهن مان رڳو 2 دوحا پهتان آهن، جيڪي جلد ايران پهچندا، جڏهن ته ٻن ايراني شهرين آمريڪا ۾ ئي رهڻ کي ترجيح ڏني ۽ پنجون پنهنجي خاندان سان گڏ ڪنهن ٽئين ملڪ ويندو.
ايران ۾ آزادي ماڻيندڙ 51 ورهين جو سيماڪ نمازي، 59 ورهين جو عماد شرقي ۽ 67 ورهين جو ماحولياتي ماهر مراد ته باز به دوحا پهچي ويا آهن، جڏهن ته ٻن جي سڃاڻپ ظاهر ناهي ڪئي وئي. جوبائيڊن انتظاميا قطر معاهدي تي عمل جي واکاڻ ڪئي ۽ آمريڪي شهرين جي حفاظت سان واپسيءَ تي قطر جي امير جا ٿورا مڃيا، مخالف ڌر ايران جا فنڊ بحال ڪرڻ تي سخت تنقيد ڪئي آهي.
