قوم جون نياڻيون سندن فخر ۽ مستقبل آهن،  هر نياڻي کي بنا فرق تعليم، صحت، حفاظت ۽ برابر موقعا ڏيڻ پ پ جي مشن جو اهم ٿنڀ آهي : بلاول

پ پ چيئرمين بلاول ڀٽو زرداري نياڻين جي عالمي ڏهاڙي تي پاڪستان سميت سڄي دنيا جي نياڻين جي همت ۽ ثابت قدمي کي ڀيٽا پيش ڪئي آهي. جاري ڪيل بيان ۾ بلاول ڀٽو زرداري چيو ته قوم جون نياڻيون سندن فخر ۽ مستقبل آهن،  هر نياڻي کي بنا فرق تعليم، صحت، حفاظت ۽ برابر موقعا ڏيڻ پ پ جي مشن جو اهم ٿنڀ آهي. سندس چوڻ هو ته نياڻين کي بااختيار ڪرڻ شهيد ذوالفقار علي ڀٽو جي ويزن جو حصو ۽ بينظير ڀٽو جو خواب آهي. پ پ چيئرمين چيو ته جڏهن هڪ نياڻي تعليم يافته ۽ بااختيار ٿيندي آهي ته اها رڳو پاڻ کي نه پر سڄي قوم کي بلند ڪندي آهي. بلاول ڀٽو زرداري چيو ته اڄ نياڻين جي عالمي ڏينهن جي موقعي تي وچن ڪريو ته هو اهڙو پاڪستان ٺاهيندا جتي هر نياڻي کي سکڻ، پڙهڻ ۽ قيادت ڪرڻ جي آزادي هجي.