لاڙڪاڻي ۾ نوجوان وقار حسين کچي جي بازيابيءَ لاءِ وارثن طرفان احتجاجي مظاهرو ڪري ڌرڻو هنيو ويو.
مغوي نوجوان جي پيرسن والد طالب حسين کچي، ياسر عباس، يوسف عرف جاني، ممتاز علي مرکنڊ، حبدار علي منگي، منظور حسين لاشاري، سيد فياض شاهه، غلام مصطفي ڀٽو ۽ ٻين جي اڳواڻيءَ ۾ پريس ڪلب اڳيان احتجاجي مظاهرو ڪري ڌرڻو هڻي نعريبازي ڪئي وئي.
احتجاج ڪندڙن ميڊيا سان ڳالهائيندي چيو ته وقار حسين کچي 7 جون تي گهران نڪرڻ بعد پراسرار نموني گم ٿيو هو جڏهن ته 20 ڏينهن بعد ڌاڙيلن غوثپور مان فون ڪري ٻڌايو ته هنن کيس پوليس وردي ۾ اچي علي گوهر آباد پوليس چوڪي وٽان اغوا ڪيو آهي.
هنن چيو ته ڌاڙيلن چيو ته نوجوان شڪارپور جي ڪچي واري علائقي ۾ آهي جنهن جي آزادي لاءِ 30 لک رپين جو بندوست ڪري ايس ايس پي جي پي ايس او اياز کيڙو سان ملو.
سندن چوڻ هو ته ڪجهه ڏينهن اڳ ڌاڙيلن نوجوان کي ڄنگهن ۾ گوليون هڻي زخمي ڪري وڊيو سوشل ميڊيا تي وائرل ڪئي هئي.
اڳواڻن چيو ته وڊيو سوشل ميڊيا تي وائرل ٿيڻ باوجود پوليس نوجوان کي بازياب نه ڪرائي سگهي آهي جنهنڪري سمورا گهر ڀاتي سخت پريشاني ۾ مبتلا آهن خدشو آهي ته ڌاڙيل کيس ماري ڇڏيندا.
احتجاج ڪندڙن آءِ جي سنڌ، ڊي آءِ جي لاڙڪاڻو ۽ ايس ايس پي ڪشمور کان مطالبو ڪيو ته نوجوان کي بازياب ڪرائي بيچيني ختم ڪئي وڃي.
