لاڙڪاڻي ۾ دڪان ۾ باهه لڳڻ سبب لکين رپين جو سامان سڙي رک ٿي ويو

لاڙڪاڻي ۾ دڪان ۾ باهه لڳڻ سبب لکين رپين جو سامان سڙي رک ٿي ويو. غوثپور پاڙي ۾ ڪرياني جي دڪان کي شارٽ سرڪٽ مان باھ لڳي وئي، جنهن جي نتيجي ۾ 20 لک رپين کان وڌيڪ سامان سڙي ويو. دڪان مالڪ آصف شيخ ۽ پاڙي وارن پنهنجي مدد پاڻ تحت باھ وسائڻ جي ڪوشش ڪئي، پر باهه تي ضابطو نه اچي سگهيو. اطلاع باوجود فائربرگيڊ عملو دير سان پهتو، جنهن سبب دڪان ۾ پيل سمورو سامان سڙي رک ٿي ويو. دڪاندار آصف شيخ صحافين کي ٻڌايو ته شارٽ سرڪٽ سبب دڪان کي باھ لڳي، بروقت اطلاع باوجود فائربرگيڊ عملو باهه وسائڻ لاءِ دير سان پهتو، اڻڄاڻ عملو باهه وسائڻ بنا واپس روانو ٿي ويو، جنهن سبب دڪان ۾ پيل 20 لک رپين کان وڌيڪ سامان سڙي خاڪ ٿي ويو.