ملڪ جي جيلن ۾ صورتحال ڳڻتي جوڳي آهي، جيل سڌارا آڻڻا پوندا : چيف جسٽس يحيٰ آفريدي

سپريم ڪورٽ جي چيف جسٽس يحيٰ آفريدي چيو آهي ته ملڪ جي جيلن ۾ صورتحال ڳڻتي جوڳي آهي، جيل سڌارا آڻڻا پوندا. چيف جسٽس يحيٰ آفريديءَ جي صدارت هيٺ جيل سڌارن بابت اجلاس ٿيو، جنهن ۾ لاهور هائيڪورٽ جي چيف جسٽس عاليه نيلم ۽ جسٽس شمس محمود مرزا شرڪت ڪئي. اجلاس ۾ تازو قيد ڪاٽيندڙ خديجا شاهه به شرڪت ڪئي. اجلاس دوران ڳالهائيندي چيف جسٽس چيوته ملڪ جي جيلن ۾ صورتحال ڳڻتي جوڳي آهي، جيلن ۾ قيدين جي گنجائش 66 هزار 625 ۽ قيدين جو انگ هڪ لک 8 هزار 643 آهي. هن چيو ته پنجاب جي جيلن ۾ گنجائش 36 هزار 365 آهي ۽ قيدي 67 هزار 837 آهن، قيدين مان 36 هزار 128 جوابدار ٽرائل شروع ٿيڻ جي انتظار ۾ آهن. چيف جسٽس چيو ته پنجاب ۾ انهن مسئلن جو هنگامي بنيادن تي حل ڪڍڻو پوندو، جيل سڌارن تي پهريون اجلاس لاهور ۾ ٿي رهيو آهي، ڇاڪاڻ ته گنجائش کان وڌيڪ قيدي پنجاب ۾ آهن.