ميرپورخاص جي دهشتگردي ٽوڙ عدالت ۾ عمرڪوٽ واسي ڊاڪٽر شاھنواز ڪيس جي ٻڌڻي

ميرپورخاص جي دهشتگردي ٽوڙ عدالت ڊاڪٽر شاهنواز ڪنڀر قتل ڪيس ۾ پير عمر سرهندي سميت ٻين جوابدارن جي ضمانت ۾ 16 نومبر تائين واڌ ڪري ڇڏي. ميرپورخاص جي دهشتگردي ٽوڙ عدالت ۾ عمرڪوٽ واسي ڊاڪٽر شاھنواز ڪيس جي ٻڌڻي ٿي. ٻڌڻي دوران سامارو واسي پير عمرجان سرھندي عدالت ۾ پيش ٿيو. گرفتاري کان اڳ واري ضمانت حاصل ڪندڙ عمرڪوٽ جو اڳوڻو ايس ايس پي آصف رضا بلوچ، سنڌڙي جو اڳوڻو ايس ايڇ او نياز کوسو، اڳوڻو سي آءِ اي انچارج عنايت علي زرداري، اڳوڻو ڊي آءِ بي انچارج دانش ڀٽي به عدالت ۾ پيش ٿيا. گرفتار ٿيل اھلڪار ھدايت الله ناريجو، فرمان، نادر ۽ غلام قادر کي پڻ عدالت ۾ پيش ڪيو ويو. عدالت ڪيس جي جوابدارن جي ضمانت ۾ 16 نومبر تائين واڌ ڪندي گرفتار جوابدارن کي 16 نومبر تائين جيل ڪسٽڊي ڪري ڇڏيو. لاش کي ساڙڻ واري ڪيس ۾ گرفتار ٿيل  18 جوابدارن کي عدالت 20 نومبر تائين ٻيھر جيل موڪلي ڇڏيو. ان موقعي تي ڊاڪٽر شاھنواز ڪيس جي پيروي ڪندڙ بئريسٽر اسد الله شاھه راشدي چيو تھ تازو ئي ايف آءِ اي وارن ھڪ ٻي ايف آءِ آر داخل ڪئي آھي، جنھن ۾ سندن ساڳيو موقف رکيو ويو آھي، جيڪو هنن سنڌڙي ٿاڻي تي داخل ايف آءِ آر ۾ ڄاڻايو آھي. ھن چيو تھ چيو ھاڻي نئين ايف آءِ آر داخل ٿيڻ کان پوءِ اڳين ايف آءِ آر جي ڪھڙي حيثيت رھندي، ان بابت عدالت سندن کان راءِ طلب ڪئي آھي، جيڪا ايندڙ ٻڌڻي تي پيش ڪئي ويندي ۽ ان بعد ئي جوابدارن جي ضمانتن بابت فيصلو ٿي سگھندو.