نواب ولي محمد ۾ زميني تڪرار دوران مارجي ويل پوليس انسپيڪٽر سميت 6 ڄڻن جي خون سان انصاف لاءِ احتجاجي ريلي مظاهرو ڪيو ويو.حاجن ڀنڊ، خميسو خان ڀنڊ، معصوم ڀنڊ، ميرل ڀنڊ ۽ ٻين جي اڳواڻيءَ ۾ نيشنل هاءِ وي کان پريس ڪلب تائين احتجاجي ريلي ڪڍي مظاهرو ڪري نعريبازي ڪئي وئي.احتجاج ۾ جي ڊبليو سي، سنڌ يونائيٽيڊ پارٽي، جسقم، ايس ٽي پي ۽ پي ٽي آءِ سميت مختلف سياسي سماجي تنظيمن شرڪت ڪئي.ان موقعي تي اڳواڻن چيو ته انسپيڪر عبدالحميد، ڀنڊ برادري جي اياز، معشوق علي، صابن ۽ اڪمل سميت 6 ڄڻن جا قاتل 18 مهينا گذرڻ باوجود گرفتار نه ٿي سگهيا آهن.هنن چيو ته بااثر ماڻهو وارثن کي ڪيس تان هٿ کڻائڻ لاءِ ڌمڪيون ڏئي رهيا آهن، ۽ سندن خلاف ڪوڙا ڪيس داخل ڪرائي ڪيس تان هٿ کڻڻ لاءِ دٻاءُ وڌو پيو وڃي.احتجاج ڪندڙن سپريم ڪورٽ، آرمي چيف ۽ نگران حڪومت کان مطالبو ڪيو ته پوليس انسپيڪٽر سميت 6 ڄڻن جي قتل ۾ ملوث سمورن جوابدارن کي گرفتار ڪري وارثن سان انصاف ڪيو وڃي، ٻي صورت ۾ نيشنل هاءِ وي تي ڌرڻو هنيو ويندو.
