- Advertisement -
همايون ڀرسان ريلوي پٽڙي تي ڌماڪي سبب جعفر ايڪسپريس جون چار بوگيون پٽڙيءَ تان لهي ويون ۽ هڪ ڄڻو زخمي ٿي پيو، سنڌ جي وڏي وزير مراد علي شاهه واقعي جو نوٽيس وٺندي مڪمل جاچ جو حڪم ڏئي ڇڏيو.
همايون ٿاڻي جي حد بيگاري ڪئنال ويجهو راولپنڊي کان ڪوئيٽا ويندڙ جعفر ايڪسپريس جون چار بوگيون پٽڙيءَ تان لهي ويون.
چار بوگيون پٽڙي تان لهڻ سبب هڪ ڄڻو زخمي ٿي پيو.
پوليس ۽ امدادي ٽيمون واقعي واري هنڌ پهچي ويون، امدادي ڪارروايون جاري آهن.
ريلوي ٽريڪ متاثر ٿيڻ سبب ٽرين جي روانگي عارضي طور معطل ڪئي وئي.
ڊپٽي ڪمشنر شڪارپور شڪيل احمد ابڙي جو چوڻ آهي ته بم ڊسپوزل اسڪواڊ کي طلب ڪيو ويو، جڏهن ته ڊي ايس ريلوي واقعي جي جاچ ڪري رهيو آهي.
سنڌ جي وڏي وزير مراد علي شاهه ريلوي ٽريڪ تي ڌماڪي جو نوٽيس ورتو.
وڏي وزير هدايت ڪندي چيو ته زخمي کي فوري طور طبي امداد فراهم ڪئي وڃي.
مراد علي شاهه کي بريفنگ ڏني وئي ته متاثر مسافر کي شروعاتي طبي امداد ڏني پئي وڃي.
وڏي وزير ڌماڪي جي مڪمل جاچ جو حڪم ڏئي ڇڏيو.
مراد علي شاهه کي آگاهي ڏني وئي ته ريلوي ٽريڪ تي صبح 10 لڳي 20 منٽن تي ڌماڪو ٿيو جنهن سبب جعفر ايڪسپريس جون 3 بوگيون پٽڙي تان لهي ويون، ڌماڪو ان وقت ٿيو جڏهن ٽرين گزري رهي هئي.
وڏي وزير جو چوڻ آهي ته واقعي جي ذميوارن کي قانون جي ڪٽهڙي ۾ آندو وڃي، ڌماڪو رياست خلاف ڪارروائي آهي، ڪنهن کي معاف نه ڪيو ويندو…….- Advertisement -
