وزيراعظم شهباز شريف اسٽريٽجڪ ادارن کانسواءِ سمورن سرڪاري ادارن کي خانگائڻ جو اعلان ڪري ڇڏيو.
وزيراعظم شهباز شريف جي صدارت ۾ خانگائڻ واري وزارت ۽ خانگائڻ بابت ڪميشن جو اجلاس ٿيو.
اجلاس ۾ خانگائڻ واري وزارت ۽ خانگائڻ بابت ڪميشن طرفان ادارن کي خانگائڻ بابت 2024ع کان 2029ع تائين جي پروگرام جو روڊ ميپ پيش ڪيو ويو.
اجلاس کي خطاب ڪندي وزيراعظم شهباز شريف جو چوڻ هو ته حڪومت جو ڪم ڪاروبار ڪرڻ ناهي، پر ڪاروبار ۽ سيڙپڪاري جي ماحول کي بهتر بڻائڻ آهي.
وزيراعظم جو چوڻ هو ته خانگائڻ جي عمل ۾ شفافيت کي پهرين ترجيح ڏني ويندي.
شهباز شريف چيو ته اسٽريٽجڪ ادارن کانسواءِ سمورن حڪومتي ادارن کي خانگايو ويندو.
سندس چوڻ هو ته سرڪاري ادارن کي خانگائڻ سان ٽيڪس ڏيندڙن جو پئسو بچندو ۽ خدمتن جي معيار کي بهتر بڻائڻ ۾ مدد ملندي.
وزيراعظم پي آءِ اي کي خانگائڻ لاءِ بڊنگ۽ اهم مرحلن کي سڌي ريت نشر ڪرڻ جي هدايت ڪندي چيو ته ٻين ادارن کي خانگائڻ جا مرحلا به ٽيلي ڪاسٽ ڪيا ويندا.
اجلاس کي سرڪاري ادارن کي خانگائڻ بابت تفصيلي بريفنگ ڏيندي ٻڌايو ويو ته پي آءِ اي کي خانگائڻ بابت اڳڀرائي وارو عمل مئي جي آخر تائين مڪمل ڪيو ويندو.
اجلاس کي ٻڌايو ويو ته آمريڪا ۾ پي آءِ اي جي هوٽل روزويلٽ کي خانگائڻ بابت ضروري صلاح مشوار جاري آهن.
