صدر آصف علي زرداري ۽ وزيراعظم شهباز شريف پاران فلسطيني عوام سان ٻڌي جي عالمي ڏهاڙي تي فلسطينين کي ڀيٽا پيش ڪئي وئي آهي.
فلسطيني عوام سان ٻڌي جي عالمي ڏهاڙي تي جاري ڪيل پيغام ۾ صدر آصف علي زرداري چيو ته پاڪستان 1967ع کان اڳ جي سرحدن موجب آزاد، فلسطيني رياست جي قيام جو حامي آهي.
سندس چوڻ هو ته عالمي ضمير فلسطين ۾ لکين ماڻهن جي ڳڻتي جوڳي حالت کي نظر انداز نٿو ڪري سگهي.
صدر آصف علي زرداري چيو ته عالمي برادري فلسطيني عوام جي نسل ڪشي روڪڻ لاءِ فوري ۽ فيصلا ڪندڙ قدم کڻي، هو آزادي، وقار ۽ انصاف لاءِ فلسيني عوام جي جائز جدوجهد ۾ ساڻن گڏ آهن.
فلسطيني عوام سان ٻڌي جي عالمي ڏهاڙي تي جاري ڪيل پيغام ۾ وزيراعظم شهباز شريف چيو ته 7 آڪٽوبر 2023ع کانپوءِ غزا ۽ اولهه ڪناري ۾ اسرائيلي جارحيت سبب هي سال فلسطين جي تاريخ جو انتهائي ڪارو سال رهيو آهي، تاريخ جا ڪريل ترين ظلم ڪيا ويا آهن.
سندس چوڻ هو ته فلسطيني عوام اسرائيل طرفان حملن، منظم نسل ڪشي ۽ تشدد جي مهم کي بهادري سان برداشت ڪري رهيو آهي.
وزيراعظم شهباز شريف چيو ته فلسطينين لاءِ اماڻيل امدادي قافلن تي حملا برداشت جوڳا ناهن، عالمي برادري فلسطين ۾ اسرائيل جي ظلمن کي روڪڻ لاءِ فيصلائتي ڪارروائي ڪري.
