اليڪشن ڪميشن چيو آهي ته وفاقي ۽ نگران صوبائي حڪومتون چونڊن ۾ خلل وجهڻ جي ڪوشش نه ڪن.
اليڪشن ڪميشن نگران وزيراعظم ۽ نگران وڏن وزيرن کي چونڊن بابت خط لکيو آهي، جنهن ۾ هر سياسي پارٽيءَ ليول پليئنگ فيلڊ ڏيڻ جي هدايت ڪئي.
اليڪشن ڪميشن جي سيڪريٽريءَ نگران وزيراعظم ۽ وڏن وزيرن کي خط لکيو، جنهن ۾ اهم هدايتون جاري ڪيون ويون.
خط ۾ چيو ويو ته قومي اسيمبلي، سنڌ ۽ بلوچستان اسيمبليون ٽٽي چڪيون آهن، جنهن بعد صاف ۽ شفاف چونڊون اليڪشن ڪميشن جي آئيني ذميواري آهي، ان بابت اليڪشن ڪميشن آئين قدم کڻڻ جو فيصلو ڪيو آهي.
اليڪشن ڪميشن خط ۾نگران حڪومتن کي هدايت ڪئي ته اليڪشن لاءِ بهترين ماحول فراهم ڪيو وڃي ۽ هر سياسي پارٽيءَ کي برابريءَ جي بنياد تي موقعو ڏنو وڃي.
خط ۾ چيو ويو ته نگران حڪومتون وقت سر چونڊن لاءِ اليڪشن ڪميشن جي مدد يقيني بڻائڻ ۽ چونڊن ۾ رنڊڪ وجهڻ جي ڪوشش نه ڪئي وڃي.
سيڪريٽريءَ خط ۾ هدايت ڪئي ته اليڪشن ڪميشن جي اجازت کانسواءِ مقرريون ۽ بدليون نه ڪيون وڃن، وفاقي ۽ صوبائي ادارن ۾ هر قسم جي ڀرتي تي پابندي تي عمل ڪيو وڃي.
خط ۾ چيو ويو ته اليڪشن ڪميشن وفاقي ۽ صوبائي حڪومتن تي هر قسم جي ترقياتي اسڪيمن تي پابندي لاڳو ڪري ڇڏي آهي، جڏهن ته ادارن ۾ ڀرتي ٿيندڙ سياسي شخصيتن جي نوڪري ختم ڪرڻ جو حڪم ڏنو آهي.
اليڪشن ڪميشن اڳوڻي وزيراعظم ۽ اڳوڻن وڏن وزيرن، ڪابينا ميمبرن، صلاحڪارن ۽ اسيمبلي ميمبرن کي سرڪاري رهائشگاهون فوري طور خالي ڪرڻ ۽ سرڪاري گاڏيون واپس ڪرڻ جي هدايت ڪئي آهي.
سيڪريٽري اليڪشن ڪميشن جو چوڻ هو ته وفاقي ۽ صوبائي نگران حڪومتون قانون موجب روزانو جي بنياد تي معاملا هلائڻ.
خط ۾ واضح ڪيو ويو ته نگران حڪومتون اڳ کان جاري عالمي ۽ ٻه طرفن معاهدن تي عمل ڪرائي سهگن ٿيون.
اليڪشن ڪميشن نگران وزيراعظم ۽ وڏن وزيرن توڙي ڪابينا ميمبرن کان اثاثن تفصيل ٽن ڏينهن ۾ طلب ڪري ورتا آهن
