پاڪستان ٻي ون ڊي ميچ ۾ دلچسپ مقابلي بعد افغانستان کي شڪست ڏئي ڇڏي.
سريلنڪا جي شهر هَمبنٽوٽا ۾ کيڏيل ٽن ون ڊي ميچن جي سيريز جي ٻي ميچ ۾ پاڪستان آخري وڪيٽ تي هدف حاصل ڪيو.
افغانستان ٽاس کٽي پهريان بيٽنگ جو فيصلو ڪيو جيڪو بهتر ثابت ٿيو، افغان اوپنرن ٽيم کي 227 رنسن جي بهتر شروعات ڪئي ۽ افغان ٽيم مقرر 50 اوورن ۾ 5 وڪيٽن جي نقصان تي ٽي سئو رنسون ٺاهيون.
افغان اوپنر رحمان الله گرباز 151 رنسن جي شاندار اننگز کيڏي ۽ شاهين آفريدي جو شڪار بڻيو، سندس اننگز ۾ ٽي ڇڪن ۽ 14 چوڪا شامل هئا، جڏهن ته ٻئي اپنر ابراهيم زادران 80 رنسون ٺاهي اسامه مير جو شڪار ٿيو.
ان کانسواءِ محمد نبي 29، راشد خان 2 ۽ شاهدالله هڪ رنس ٺاهي رن آئوٽ ٿيو، ڪپتان هشمت الله شاهدي 15 ۽ عبدالرحمان 4 رنسن سان گڏ ناٽ آئوٽ رهيا.
پاڪستان طرفان نسيم شاهه 9 اورن ۾ 45 رنسون ڏئي هڪ وڪيٽ حاصل ڪئي، اسامه مير 10 اورن ۾61 رنسون ٺاهي هڪ وڪيٽ ورتي، جڏهن ته حارث رئوف ستن اوورن ۾ 48 ۽ شاداب خان 10 اوورن ۾ 53 رنسون ڏنيون.
جواب ۾ قومي ٽيم 301 رنسن جو حدف 49 هين اوور ۾ آخري وڪيٽ تي هاصل ڪيو.
قومي ٽيم جي اوپنرن ذميوراڻي انداز ۾ شروعات ڪئي ۽ ٽيم کي 52 رنسن جي پاٽنرشپ فراهم ڪئي، 30 رنسن تي فخر زمان فضل حق جي بال تي بولڊ ٿي ويو.
ان کانپوءِ ڪپتان بابر اعظم اچي اوپنر امام الحق سان گڏجي ٽيم جو اسڪور 170 تائين پهچايو، جنهن دوران بابر به فضل حق جو شڪار بڻيو ۽ هن 53 رنسن جي اننگز کيڏي، جنهن بعد پاڪستاني بيٽنگ لائن مشڪلاتن جو شڪار نظر آئي.
آغا سلمان 14 رنسون ٺاهي آئوٽ ٿيو ۽ رضوان به صرف 2 رنسون ٺاهي سگهيو، امام الحق به 91 رنسون ٺاهي آئوٽ ٿي ويو، شاداب خان بهتر اننگز کيڏي ۽ 35 بالن تي 48 رنسون ٺاهي رن آئوٽ ٿيو.
آخري اوورن ۾ نسيم شاهه هڪ ڀيرو ٻيهر وننگ اننگز کيڏي ۽ هن قيمتي 10 رنسون ٺاهي فتح افغانستان ٽيم جي هٿ مان کسي ورتي.
افغانستان طرفان فضل الحق فاروقي ٽي، محمد نبي ٻه، مجيب الرحمان ۽ عبدالرحمان هڪ هڪ وڪيٽ حاصل ڪئي….
