پنجاب جي اڳوڻي وڏي وزير چوڌري پرويز الاهيءَ کي سرڪاري ٺيڪن ۾ ڪرپشن واري ڪيس ۾ چوڏهن ڏينهن جي جسماني رمانڊ تي نيب حوالي ڪيو ويو آهي.
تحريڪ انصاف جي صدر ۽ اڳوڻي وڏي وزير پرويز الاهيءَ کي نيب جي احتساب عدالت ۾ پيش ڪيو ويو ۽ جج زبير شهزاد ٻڌڻي ڪئي.
ٻڌڻي دوران پرويز الاهيءَ جي وڪيل پنهنجي اصيل سان صلاح مشوري جي اجازت گهري، جيڪا کيس ڏني وئي.
نيب پراسيڪيوٽر وارث علي جنجوعا جج کان پرويز الاهيءَ جو جسماني رمانڊ طلب ڪندي دليل ڏنا ته پرويز الاهي تي سرڪاري ٺيڪن ۾ ڪرپشن ۽ ڪڪ بيڪس وٺڻ جو ڪيس آهي.
هن چيو ته پرويز الاهي پنجاب جو وڏو وزير بڻيو ته گجرات لاءِ اربين رپين جا ٺيڪا ڏنا.
پرويز الاهيءَ جي وڪيل چيو ته سندس اصيل جي گرفتاريءَ خلاف سپريم ڪورٽ ۽ لاهور هائيڪورٽ ۾ ڪيس ٻڌڻي هيٺ آهن، پوءِ به کيس گرفتار ڪيو ويو.
احتساب عدالت پرويز الاهيءَ جو 21 آگسٽ تائين جسماني رمانڊ منظور ڪندي کيس جاچ لاءِ نيب حوالي ڪري ڇڏيو
