پرڏيهي وزير اسحاق ڊار چين جي ايگزيڪيوٽو نائب وزيراعظم سان ملاقات ڪئي، جنهن دوران اهم معاملن تي خيالن جي ڏي وٺ ڪئي وئي.
پرڏيهي آفيس جي ترجمان موجب، ٻنهي اڳواڻن جي ملاقات ۾ ٻنهي طرفن جا اعليٰ عملدار موجود هئا ۽ پرڏيهي وزير 26 مارچ تي ٿيل شانگلا حملي تي ڏک جو اظهار ڪيو.
ترجمان جو چوڻ آهي ته اسحاق ڊار واقعي ۾ ملوث جوابدارن کي انصاف جي ڪٽهڙي ۾ آڻڻ جو يقين ڏياريو ۽ مارجي ويل چيني ڪارڪنن جي خدمتن کي ساراهيو.
پرڏيهي آفيس جي ترجمان چيو ته ٻنهي اڳواڻن جي ملاقات دوران پاڪ چين اقتصادي راهداري جي ٻئي مرحلي بابت ڳالهه ٻولهه ڪئي وئي، جڏهن ته اسحاق ڊار ۽ چين جي ايگزيڪيوٽو نائب وزيراعظم وچ ۾ واپار، اقتصادي سهڪار ۽ سيڙپڪاري سميت ٻه طرفي لاڳاپن جي مختلف مختلف معاملن تي خيالن جي ڏي وٺ به ڪئي وئي.
ترجمان موجب، ملاقات ۾ خنجراب بارڊر ڪراسنگ ذريعي رابطن ۽ ويزا جي آسان نظام بابت ڳالهيون ڪيون ويون، جڏهن ته سهڪار جي سمورن شعبن ۾ پاڪ چين لاڳاپن جي وڌندڙ رفتار کي برقرار رکڻ ۽ دوستي کي وڌيڪ مضبوط ڪرڻ تي اتفاق ڪيو ويو.
ترجمان جو چوڻ آهي ته پرڏيهي وزير اسحاق ڊار توانائي ۽ انفراسٽرڪچر ۾ سي پيڪ پاران اڳڀرائي جو جائزو ورتو، صنعت، زراعت، ۽ معدني ترقي جي شعبن ۾ ٻئي مرحلي تحت هاڪاري منافع تي اعتماد جو اظهار ڪيو.
ترجمان موجب، چين جي ايگزيڪيوٽو نائب وزيراعظم معيشيت، واپار ۽ سيڙپڪاري سميت سهڪار جي سمورن شعبن ۾ پاڪستان لاءِ چين جي مڪمل حمايت جو اظهار ڪيو ۽ گڏيل خوشحالي توڙي ترقي لاءِ سي پيڪ منصوبن تي تيزي سان عمل جي اهميت کي ورجايو.
