پيپلزپارٽي ۽ مسلم ليگ نون جي رابطا ڪميٽين جو اجلاس ٻيهر ٿي رهيو آهي

پيپلزپارٽي ۽ مسلم ليگ نون جي رابطا ڪميٽين جو اجلاس ٻيهر ٿي رهيو آهي. ذريعن جو چوڻ آهي ته پنجاب بابت پيپلزپارٽيءَ جي نون مطالبن تي مسلم ليگ نون حيران آهي، پ پ گورنر ۽ پنجاب اسيمبلي جي اسپيڪر جو مطالبو ڪري ڇڏيو. ذريعن موجب، مسلم ليگ نون طرفان به بلوچستان ۾ پنهنجي حڪومت قائم ڪرڻ لاءِ مدد طلب ڪئي وئي آهي. ذريعن جو چوڻ آهي ته پيپلزپارٽي طرفان بلوچستان جي وڏ وزارت جي مطالبي تي ڊيڊ لاڪ برقرار آهي. ذريعن موجب، سينيٽ چيئرمين يا قومي اسيمبليءَ جي اسپيڪر جي عهدن مان هڪ عهدو ن ليگ پاران پاڻ وٽ رکڻ جو مطالبو آهي. ذريعن جو چوڻ آهي ته صدر جو عهدو پيپلزپارٽي کي ڏيڻ جي صورت ۾ لکت ۾ معاهدو ٿيندو، ٻنهي ۾ عدم اعتماد سبب سمورن فيصلن کي لکت جي شڪل ڏني ويندي. ذريعن موجب، اڄ ٿيندڙ ڳالهيون فيصلائتون ثابت ٿي سگهن ٿيون. ن ليگ ذريعن جو چوڻ آهي ته هو ڪنهن نتيجي تي پهچڻ جي ڪوشش ڪري رهيا آهن. ذريعن موجب، ن ليگ سينيٽ چيئرمين لاءِ اسحاق ڊار ۽ اعظم نذير تارڙ جا نالا پيش ڪري ڇڏيا.