فيض گنج تعلقي جي هيڊڪواٽر شهر پڪا چانگ ۾ بدامني خلاف شٽر بند هڙتال ڪري شهري اتحاد جي سڏ تي احتجاجي مظاهرو ڪري ڌرڻو هنيو ويو.
هڙتال سبب پڪا چانگ شهر ۾ ننڍا وڏا ڪاروباري مرڪز مڪمل طور بند رهيا جڏهن ته شهري اتحاد جي سڏ تي احمد حسين چانگ، تصور باقي، اعظم ميمڻ ۽ ٻين جي اڳواڻيءَ ۾ احتجاجي مظاهرو ڪري ڌرڻو هڻي نعريبازي ڪئي وئي.
احتجاج ڪندڙن ميڊيا سان ڳالهائيندي چيو ته شهر ۽ ڀرپاسي وارن علائقن ۾ بدامني جي باهه ڀڙڪي پئي آهي، گذريل ڏينهن سيٺ الهڏنو ميمڻ جي دڪان مان هٿياربندن ڏينهن جو هٿيارن جي زور تي ڏيڍ لک رپيا ۽ ٻيو سامان ڦر ڪري ويا.
هنن چيو ته دڪاندارن مٿان سڌي فائرنگ ڪئي وئي، شهر اندر روزانو چوريون ۽ ڦرون معمول بڻيل آهي، پوليس امن امان قائم ڪرڻ ۾ مڪمل ناڪام بڻيل آهي.
سندن چوڻ هو ته رهواسي توڙي ڪاروباري ماڻهو عدم تحفظ جو شڪار بڻجي چڪا آهن، سڄو ڏينهن پورهيو ڪري وري ماڻهن کي رات جو چورن جي خوف سبب جاڳڻو پوي ٿو.
احتجاج ڪندڙن آءِ جي سنڌ، ڊي آءِ جي سکر ۽ ايس ايس پي خيرپور مطالبو ڪيو ته بدامني تي ضابطو آڻي ڦر ٿيل رقم ۽ سامان واپس ڪرائي تحفظ فراهم ڪيو وڃي.
