- Advertisement -
ميرپورخاص پوليس پاران جعلي مقابلي ۾ ماريل ڊاڪٽر شاھنواز جي ٻيھر ڪيل پوسٽ مارٽم رپورٽ ۾ سندس جسم ساڙڻ سميت ڪُلھي جي ھڏي بھ ٽٽل ھئڻ جو انڪشاف ٿيو آهي.
ميرپورخاص پوليس ھٿان جعلي مقابلي ۾ مارجي ويل ڊاڪٽر شاھنواز ڪنڀر جي قبرڪشائي بعد ڪيل پوسٽ مارٽم جي شروعاتي رپورٽ جي مڪمل ڪاپي سنڌ ٽي وي نيوز ھٿ ڪري ورتي.
رپورٽ ۾ ڊاڪٽر شاھنواز جي جسم کي باھ ڏئي ساڙڻ جو بھ انڪشاف ٿيو آھي.
پوليس سرجن حيدرآباد ۽ لمس جي چئن ڊاڪٽرن پاران ڪيل پوسٽ مارٽم جي شروعاتي رپورٽ ۾ ٻڌايو ويو آھي تھ ڊاڪٽر شاھنواز جي پنجن پاسراٽين سميت ڪُلھي جي ھڏي بھ ٽٽل ھئي، جنھن ھڏي جا ڪجهھ حصا گم ٿيل بھ آھن.
رپورٽ ۾ پاسراٽين ٽٽڻ بابت ٻڌايو ويو آھي تھ ڊاڪٽر جي کاٻي پاسي واري پھرين پاسراٽي گولي لڳڻ سبب ٽٽل ھئي، جڏھن تھ زوردار ڌڪ لڳڻ سبب ساڄي پاسي واريون 4 پاسراٽيون ٽٽل ھيون.
رپورٽ ۾ ڄاڻايو ويو آھي تھ ڊاڪٽر شاھنواز جي لاش جو اڳيون حصو، چھرو ۽ مٿي جا وار ۽ چمڙي بھ سڙيل ھئي.
پوسٽ مارٽم رپورٽ ۾ اھو پڻ انڪشاف ڪيو ويو آھي تھ ڊاڪٽر جي ٻنھي ھٿن جا نُنھن ۽ پير بھ جزوي طور ساڙيل ھئا.
شروعاتي رپورٽ ۾ اھو پڻ ڄاڻايو ويو آھي تھ ڊاڪٽر شاھنواز جي جسم جا مختلف جزا ڊي اين اي ٽيسٽ ۽ ڪيميڪل ايگزامنيشن لاءِ ليبز ۾ موڪليا ويا آھن، جيڪي اچڻ بعد مڪمل رپورٽ جوڙي ويندي.- Advertisement -
