ڪنڌڪوٽ ويجهو بي سيڪشن ٿاڻي جي حد مان هٿياربند پيٽرول پمپ جي منشي کي مبينا طور اغوا ڪري ويا، جڏهن ته مزاحمت تي هيلپر کي تشدد ڪري زخمي ڪري ڇڏيو، واقعي خلاف مغوي جي وارثن پاران احتجاجي مظاهرو ڪري ڌرڻو هنيو.
قمبراڻي لاڙي ڀرسان پيٽرول پمپ تي ڇهه اڻڄاتل هٿياربندن ڪاهه ڪري مبينا طور منشي وحيد ملڪ کي اغوا ڪري ويا ۽ مزاحمت تي هليپر عابد علي قمبراڻي کي تشدد ڪري زخمي ڪري ڇڏيو.
مغوي عبدالوحيد جي وارثن آفتاب ملڪ، حاجن ملڪ، بهادر ملڪ، عرفان ملڪ ۽ ٻين قمبراڻي لاڙي وٽ انڊس هاءِ وي تي ٽائر ساڙي ڌرڻو هڻي روڊ بلاڪ ڪري ڇڏيو.
مظاهرين چيو ته ڪشمور ضلعي کي ڏوهارين حوالي ڪري پوليس اگهور ننڊ ستل آهي.
هنن چيو ته پوليس جي نااهلي جي ڪري ماڻهو نه گهرن ۾ محفوظ آهن ۽ نه ئي گهرن کان ٻاهر.
وارثن چيو ته ضلعي اندر پوليس جي رٽ بلڪل ختم ٿي چڪي آهي.
هنن اعليٰ اختيارين کان مطالبو ڪيو ته معاملي جو نوٽيس وٺي ترت مغوي کي بازياب ڪرايو وڃي، ٻي صورت ۾ احتجاج جو دائرو وڌايو ويندو
