گرينڊ ڊيموڪريٽڪ الائنس ايندڙ عام چونڊن ۾ پ پ مخالف اتحاد جو دائرو وڌائڻ جو اعلان ڪري ڇڏيو.
حيدرآباد ۾ جي ڊي اي جي مرڪزي سيڪريٽري جنرل سردار عبدالرحيم، ايڊووڪيٽ چوڌري ظفرالله ۽ ٻين سان گڏ پريس ڪانفرنس ڪندي چيو ته اليڪشن آئين جي روح موجب صاف ۽ شفاف ٿيڻ گھرجي.
ھن چيو ته جي ڊي اي سنڌ ۾ ھڪ مضبوط سياسي اتحاد آھي، جنھن ۾ ٻين قومپرست، سياسي ۽ مذھبي جماعتن کي شامل ڪيو ويندو.
سردار عبدالرحيم جو چوڻ هو ته جي يو آءِ، ايم ڪيو ايم ۽ جي ڊي اي جي وچ ۾ پ پ خلاف گڏيل اليڪشن اتحاد کي مضبوط ڪرڻ تي اتفاق ٿيو آھي ۽ هو سمجھن ٿا ته پ پ سنڌ لاءِ ناسور بڻجي وئي آھي.
ھن چيو ته جي ڊي اي 2018ع جي اليڪشن ۾ سنڌ اندر وڌيڪ ووٽ حاصل ڪيا ۽ نتيجا تبديل ٿيڻ باوجود سنڌ ۾ 14 سيٽون کٽيون.
سندس چوڻ هو ته پ پ مخالف سمورين سياسي جماعتن سان اتحاد بابت ڳالھيون ٿي سگھن ٿيون، تحريڪ انصاف جڏھن سنڌ ۾ سياسي ميدان تي ايندي ته ان سان اتحاد ڪرڻ يا نه ڪرڻ بابت فيصلو ڪيو ويندو.
جي ڊي اي اڳواڻ سردار عبدالرحيم چيو ته ايندڙ عام چونڊن ۾ هو پيپلزپارٽي کي اڪيلو ڪري ڇڏيندا، ٻيھر پ پ جي سليڪشن ٿيڻ نه ڏيندا. هن چيو ته هو جمھوريت، آئين ۽ قانون جي بالادستي تي يقين رکن ٿا، جيڪڏھن ڪنھن به پارٽي سان ڪا زيادتي ٿي آھي ته اھا عدالت وڃي سگھي ٿي.
