سنڌ هائيڪورٽ گم ٿيل شهرين جي بازيابيءَ بابت درخواستن تي جي آءِ ٽي ۽ صوبائي ٽاسڪ فورس جا اجلاس گهرائڻ جو حڪم ڏيندي ايندڙ ٻڌڻي تي سڄي ملڪ جي حراستي مرڪزن، ايجنسين، صوبائي گهرو وزير، آءِ جي سنڌ ۽ ٻين کان رپورٽ طلب ڪندي ٻڌڻي چئن هفتن لاءِ ملتوي ڪري ڇڏي.
سنڌ هاءِ ڪورٽ گم ٿيل شهرين جي بازيابيءَ بابت درخواستن جي ٻڌڻي ٿي.
ٻڌڻي دوران گهرو کاتي، پوليس ۽ ٻين لاڳاپيل ادارن جا نمائندا عدالت ۾ پيش ٿيا، جڏهن ته ڪيترن ئي گم ٿيل شهرين جا گهرڀاتي عدالت ۾ پيش نه ٿي سگهيا.
جاچ آفيسر موقف اختيار ڪيو ته هڪ سياسي تنظيم جو ڪارڪن قاضي اعجاز الدين سرجاني ٽائون واري علائقي مان گم آهي، شهري جي گهرواري ٻڌايو آهي ته سندس مڙس هڪ سياسي تنظيم جو ميمبر هو.
جاچ آفيسر چيو ته جي آءِ ٽي ۾ انڪشاف ڪيو ويو آهي ته شهري اسٽيٽ ايجنسي جو ڪم به ڪندو هو، شهري جي دوستن جو چوڻ هو ته شهري تمام گهڻو قرض ورتو هو، جنهن سبب هو پاڻ گم آهي.
جاچ آفيسر چيو ته بلال ڪالوني ٿاڻي جي حد مان شهري جي گم ٿيڻ جو ڪيس داخل ڪيو ويو آهي، لياقت آباد واري علائقي مان صابر، ناظم آباد مان عزيز الحسن ۽ ٻيا شهري مختلف علائقن مان گم آهن.
عدالت جي آءِ ٽي ۽ صوبائي ٽاسڪ فورس جا اجلاس گهرائڻ جو حڪم ڏيندي ايندڙ ٻڌڻي تي سڄي ملڪ جي حراستي مرڪزن، ايجنسين، صوبائي گهرو وزير، آءِ جي سنڌ ۽ ٻين کان رپورٽ طلب ڪندي ٻڌڻي چئن هفتن لاءِ ملتوي ڪري ڇڏي.
