آرمي چيف پاران سعودي عرب جو دورو، سعودي ولي عهد سان ملاقات

آرمي چيف جنرل عاصم منير،  سعودي ولي عهد شهزادي محمد بن سلمان سان ملاقات ڪئي آهي. آءِ ايس پي آر پاران جاري ڪيل پڌرائي موجب سعودي عرب جي راڄڌاني رياض ۾ ملاقات دوران ٻه طرفي لاڳاپن، علائقائي ۽ عالمي مسئلن سميت گڏيل دلچسپي وارن معاملن تي خيالن جي ڏي وٺ ڪئي وئي. آءِ ايس پي آر موجب آرمي چيف جنرل عاصم منير ۽ سعودي ولي عهد شهزادي محمد بن سلمان وچ ۾ ملاقات جي موقعي تي سعودي عرب جو بچاءَ وارو وزير شهزادو خالد بن سلمان ۽ سعودي سفير نواف المالڪي به موجود هئا. آءِ ايس پي آر موجب  سعودي عرب ۾ پاڪستان جو سفير احمد فاروق ۽ ٻيا عهديدار به ملاقات جي موقعي تي آرمي چيف سان گڏ موجود هئا. سعودي ولي عهد شهزادي محمد بن سلمان چيو ته سعودي عرب ۽ پاڪستان جا تاريخي ۽ مضبوط ڀائراڻا لاڳاپا آهن، سعودي عرب ۽ پاڪستان هميشه هڪ ٻئي سان گڏ بيٺل رهيا آهن. هن پاڪ سعودي لاڳاپن کي وڌيڪ مضبوط بڻائڻ جي خواهش جو اظهار ڪندي چيو ته سعودي عرب مستقبل ۾ هميشه پاڪستان سان گڏ بيٺل رهندو. آءِ ايس پي آر موجب آرمي چيف سعودي قيادت جي پاڪستان لاءِ حمايت ۽ جذبن تي سندن ٿورا مڃيا.