- Advertisement -
روس، بم ڌماڪي ۾ جنرل جي مارجڻ واري واقعي ۾ ملوث هڪ اُزبڪ نوجوان کي گرفتار ڪري ورتو، جنهن ڏوهه جو اعتراف ڪري ورتو آهي.
روس جي سڪيورٽي سروسز ڪيميائي ۽ حياتياتي تحفظ واري فورس جي سربراهه ليفٽيننٽ جنرل اِگور ڪريلوف جي بم ڌماڪي ۾ مارجڻ واري واقعي بعد جاري ڪيل هڪ بيان ۾ چيو آهي ته 29 سالن جي هڪ ازبڪ نوجوان کي گرفتار ڪيو ويو آهي.
بيان ۾ گرفتار جوابدار جو نالو نه ظاهر ڪيو ويو آهي پر وڌيڪ چيو ويو آهي ته شڪي جوابدارکي يوڪرين جي انٽيليجنس اداري ڀرتي ڪيو هو، جنهن جو اعتراف هن جاچ دوران ڪيو هو.
روسي فورسز پاران جوابدار جو هڪ وڊيو بيان پڻ جاري ڪيو ويو آهي جنهن ۾ هو چئي رهيو آهي ته ڪارروائيءَ جي بدلي ۾ کيس هڪ لک ڊالر ۽ يورپي يونين ۾ مستقل رهائش جي آڇ ڪئي وئي هئي.
روسي فورسز جي بيان موجب يوڪريني اختيارين جي هدايتن تي ئي جوابدار ماسڪو پهتو ۽ کيس هٿ جو ٺاهيل ڌماڪي وارو ڊوائس فراهم ڪيو ويو، جيڪو هن اسڪوٽر ۾ لڳائي ان کي جنرل جي گهر ٻاهران بيهاري ڇڏيو.
روس جي تابڪاري، ڪيميائي ۽ حياتياتي تحفظ واري فورس جو سربراهه ليفٽيننٽ جنرل اِگور ڪريلوف اڱاري ڏينهن هڪ ڌماڪي ۾ مارجي ويو هو.
جنرل جي گهر ٻاهران ٿيل ان ڌماڪي ۾ ڌماڪيدار مادو هڪ اسڪوٽر ۾ رکيو ويو، جيڪو ريموٽ ڪنٽرول ذريعي ڦاڙيو ويو.
بم ڌماڪي جي ذميواري يوڪرين جي سڪيورٽي سروس قبولي هئي.- Advertisement -
